Тошкентга йил якунига қадар 190 дона MAN А22 CНГ русумли катта сиғимли янги автобус келтирилади. Бу ҳақда пойтахт ҳокимлиги матбуот хизмати хабар берди.
Қайд этилишича, янги автобуслар президентнинг 2022 йил 2 февралдаги «Тошкент шаҳар жамоат транспорти тизимини янада ривожлантиришга доир қўшимча чора-тадбирлар тўғрисида»ги қарорига асосан олиб келинади.
Бу русумдаги автобуслар 30 та ўтириш ва 60 туриш ўрнига мўлжалланган, кондиционерлар билан жиҳозланган, сиқилган табиий газда ишлайди. Сотиб олинган автобуслар ишлаб турган автобуслар қаторига киритилиб, ҳозир уларнинг қайси йўналишларга чиқиши кўриб чиқилмоқда. Баъзи йўналишларда улар кам сиғимли Isuzu’лар ўрнини эгаллаши ҳам мумкин.
Йил якунигача яна 25 та ўтириш ва 31 та туриш ўрнига эга бўлган 85 дона SAZ LE-60 ўрта сиғимли автобуслар ҳам олиб келинади. Улар 2022 йилда харид қилинган шу русумдаги 115 дона автобусларга қўшилади.
Yutong русумидаги 20 дона электробусдан иборат паркка жорий йилда янги электробуслар қўшилмайди, улар келгуси йилда олиб келинади.
Мавзуга доир: Тошкент жамоат транспортида ҳаракатланиш оралиқ вақти 2 баробарга қисқаради
Изоҳ (0)