Сирдарё вилояти Ховос туманида суғориладиган экин ер майдонини яроқсиз ҳолга келтириш ҳолати аниқланди. Бу ҳақда Иқтисодий жиноятларга қарши курашиш департаменти хабар берди.
Қайд этилишича, Бош прокуратура ҳузуридаги департаментнинг Ховос тумани бўлими томонидан терговга қадар текширув ўтказилган. Унда «Ш.» фермер хўжалиги ва «З.З.» МЧЖ мансабдор шахслари ўзаро тил бириктириб, фермер хўжалигига ажратилган 26,4 гектар ер майдонининг 10 гектарини лимонария ташкил этиш учун «З.З.» МЧЖга ижарага бериб, ушбу ер майдонида 15 823 куб метр қум-шағал аралашмасини ўзбошимчалик билан қазиб олгани аниқланган.
Шунингдек, 50 сотих суғориладиган экин ер майдонининг унумдор қатламини яроқсиз ҳолга келтиргани оқибатида давлат ва жамият манфаатларига 593,1 миллион сўм зарар етказилган.
Мазкур ҳолат юзасидан Жиноят кодексининг 229-моддаси (ўзбошимчалик) билан жиноят иши қўзғатилиб, тергов ҳаракатлари ўтказилмоқда.
Изоҳ (0)