Ўзбекистонда хизмат кўрсатган артист Равшан Намозов вафот этди. Бу ҳақда хонанда Моҳира Асадова Instagram’даги саҳифасида маълум қилди.
«Ўзбек мусиқа санъати оғир жудоликка учради. Оғир ва узоқ давом этган хасталикдан сўнг қадрдон ҳамкасб дўстимиз ва акамиз бу фоний дунёни тарк этиб, боқий дунё томон риҳлат қилдилар. Равшан ака билан қачон кўришиб қолсак, суҳбатимиз доим мусиқа санъати ҳақида бўларди. Чунки у киши мусиқий ғоялари ўзгачалиги билан бошқалардан доим ажралиб турарди...
Охиратингиз обод, руҳингиз шод бўлсин Равшан ака! Дийдор қиёматга қолди», —деб ёзади Моҳира Асадова.
Январь ойида хонанданинг оғир аҳволда гематология шифохонасида даволанаётгани маълум бўлган эди.
Эслатиб ўтамиз, Ўзбекистонда хизмат кўрсатган артист Равшан Намозов 1961 йилнинг 10 июлида Сурхондарё вилоятининг Термиз шаҳрида туғилган. Термиз мусиқа билим юртини тамомлаб, отаси — Ўзбекистонда хизмат кўрсатган артист Абдураҳмон Намозов ва Шокир Маҳмудовлардан сабоқ олган. У фаолиятини 1989 йили ташкил этилган «Қарс» гуруҳида бошлаган. У 1985 йил Германия ўтказилган «Ёшлар фестивалида» ва 1989 йили Олмаота шаҳрида ташкил этилган «Осиё овози» кўрик танловида Гранд-Прини қўлга киритган. 1991 йилдан буён яккахон ижод қилаётган хонанда 1993 йили Ўзбекистонда хизмат кўрсатган артист унвони билан тақдирланган.
Изоҳ (0)