Xonanda Ravshan Namozov og‘ir ahvolda gematologiya shifoxonasida davolanayotgani ma’lum qilindi

O‘zbek shou-biznesi vakillari Instagram’dagi sahifalari orqali O‘zbekistonda xizmat ko‘rsatgan artist Ravshan Namozovning gematologiya shifoxonasida davolanayotgani, unga shoshilinch qon kerakligi, salomatligi jiddiy xavf ostida ekanligi haqida post joylamoqda. Vaziyatga oydinlik kiritish maqsadida “Daryo” muxbiri Nargiza Murodova xonandaning singlisi Malika Namozova bilan bog‘landi.

— Haqiqatan ham akamning sog‘lig‘ida muammo bor. U bir necha kundan buyon kasalxonada. Akam 7 yildan buyon 2-darajadagi xafaqon xastaligi bilan kurashadi. Qonga zarurat bo‘lgani uchun yaxshi insonlarning ko‘magiga muhtojmiz. Qon guruhining ahamiyati yo‘q, faqatgina kasallanmagan, sog‘lom insonning qoni bo‘lsa bas. Iltimos, akam sog‘ayib, oyoqqa turib ketishiga ko‘mak beringlar, — deydi xonandaning singlisi Malika Namozova.

Eslatib o‘tamiz, O‘zbekistonda xizmat ko‘rsatgan artist Ravshan Namozov 1961-yilning 10-iyulida Surxondaryo viloyatining Termiz shahrida tug‘ilgan. Termiz musiqa bilim yurtini tamomlab, otasi — O‘zbekistonda xizmat ko‘rsatgan artist Abdurahmon Namozov va Shokir Mahmudovlardan saboq olgan. U faoliyatini 1989-yili tashkil etilgan “Qars” guruhida boshlagan. U 1985-yil Germaniya o‘tkazilgan “Yoshlar festivalida” va 1989-yili Olmaota shahrida tashkil etilgan “Osiyo ovozi” ko‘rik tanlovida Grand-Prini qo‘lga kiritgan. 1991-yildan buyon yakkaxon ijod qilayotgan xonanda 1993-yili O‘zbekistonda xizmat ko‘rsatgan artist unvoni bilan taqdirlangan.

Ravshan Namozov zamonaviy surxon qo‘shiqlari bilan tinglovchilarga yaxshi tanish. Uning “Chipradalli”, “Kovushim”, “Yor-yor yoron-ey”, “Biyo-biyo”, “Xayol” kabi qo‘shiqlari san’at shinavandalarining ko‘nglidan joy olgan.