Ижтимоий тармоқларда Қашқадарё вилояти Чироқчи туманида маст фуқаро йўл-патруль хизмати инспекторини онасидан сўкиб, унга куч ишлатгани акс этган видеолавҳа тарқалди. Ички ишлар вазирлиги матбуот хизмати раҳбари Шоҳрух Ғиёсов ҳолатга муносабат билдирди.
Қайд этилишича, ҳолат 21 сентябрь куни соат 15:40 ларда Қашқадарё вилояти ҳудудидан ўтувчи 4Р Яккабоғ—Чироқчи—Кўкдала—Шўрбозор автомобиль йўлининг 66-километрида содир бўлган. Чироқчи тумани ЙПХ инспектори сержант А.Раҳматов томонидан текшириш учун Nexia транспорт воситаси тўхтатилган. Шунда машинадаги йўловчи — фуқаро Ш.М. (1991 йилда туғилган) маст ҳолатда ходимнинг қонуний ҳаракатларига ҳалақит бериб, уни ҳақорат қилган.
Ходим жамоат тартибини бузилишини олдини олиш учун рация орқали ёрдамчи наряд чақиртирганида, Ш.М. воқеа жойидан яширинмоқчи бўлган.
Тармоқда тарқалган видеотасвирда ходим ҳуқуқбузарнинг воқеа жойидан қочиб кетишини олдини олиб, унга нисбатан жисмоний куч ишлатаётган ҳолати тасвирланган.
Ҳозирда ҳолат юзасидан Жиноят кодексининг 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилиб, ҳуқуқбузар процессуал тартибда қамоққа олинган.
«ЙПХ инспектори А.Раҳматовнинг ўз вазифасини босиқлик билан, провокацияларга учмаган ҳолда бажаргани, ёрдамчи кучлар етиб келгунга қадар вазиятни издан чиқишига ва ҳуқуқбузарни яширинишига йўл қўймагани учун навбатдан ташқари рағбатлантириш масаласи кўрилмоқда», — дейилади хабарда.
Изоҳ (0)