Ижтимоий тармоқлар орқали Тошкент вилояти Пискент туманида дарахтларга оммавий қирғин келтирилаётгани ҳақида хабар тарқалди. Тошкент вилояти Экология бошқармаси ҳолатга изоҳ берди.
Қайд этилишича, мурожаат юзасидан ўрганиш ишлари олиб борилган. Ўрганишлар давомида Пискент тумани давлат ўрмон хўжалигининг Ангрен бўлими 69-кварталида тол манзарали дарахтлари Ўрмон хўжалиги давлат қўмитасининг тегишли буйруқларига асосан 7 март куни 42 туп тол дарахтини қайта тиклаш ҳамда шу йил 8 июлда 51 туп айни шу турдаги дарахтларни эса соғломлаштириш ишлари олиб борилгани маълум бўлган.
Шунингдек, ҳудуд қайтада кўздан кечирилганда қайта тиклаш ҳамда соғломлаштириш ишлари олиб борилган дарахтлардан ташқари бошқа мавжуд дарахтларга зиён етказилмагани аниқланган.
Давлат Ўрмон хўжалиги масъулларининг билдиришича, бу каби амалиётлар шу пайтга қадар ҳам тизимли равишда ўтказилб келинмоқда. Бунинг натижасида тол дарахтларининг ўсувчанлиги янада ошиши кузатилади. Ушбу ҳудуддаги толларнинг ҳам ҳозирда ривожланиши яхши бўлиб, доимий агротехник тадбирлар олиб борилмоқда.
Изоҳ (0)