Россия президенти Владимир Путин Саудия Арабистони валиаҳд шаҳзодаси Муҳаммад бин Салмон билан телефон орқали мулоқот қилди. Улар нефть бозорида барқарорликни таъминлаш бўйича ҳаракатларни мувофиқлаштириш масалаларини муҳокама қилган. Бу ҳақда «Коммерсантъ» хабар бермоқда.
Иккала томон ҳам ОПЕК+ доирасидаги саъй-ҳаракатларни юқори баҳолади, эришилган келишувларга риоя қилишда давом этиш ниятини тасдиқлади, — дейилади Кремль матбуот хизматида.
Икки давлат раҳбарлари, шунингдек, Шанхай ҳамкорлик ташкилоти доирасидаги ҳамкорлик ва Саудия Арабистони кўмагида ташкил этилган Россия ва Украина ўртасида 22 сентябрь куни маҳбуслар алмашинувини муҳокама қилди.
Сентябр ойи бошида йирик нефть қазиб олувчи давлатлар 2020 йил май ойидан бери биринчи марта қазиб олиш квотаси камайтирди — октябр ойида у кунига 100 минг баррелга камаяди.
ОПЕК 2023 йилда Россияда нефть қазиб олиш кунига 0,4 миллион баррелга қисқаришини тахмин қилмоқда.
Энергия нархлари тушиб кетгани ва Украинадаги қарийб етти ойлик уруш қимматга тушаётгани сабабли Россия иқтисодиётида кескинликнинг янги белгилари аллақачон пайдо бўлган.
Россия Молия вазирлиги ўтган ҳафта эълон қилган маълумотларга кўра, Россия бюджетининг профицити ёзда бутунлай йўқолди. Июнь ойи охирида профицит 1,37 триллион рублни (23 миллиард доллар) ташкил этди, август ойининг охирига келиб у атиги 137 миллиард рублга (2,3 миллиард доллар) тушди.
Мамлакат даромадлари босим остида — нефть анъанавий равишда табиий газдан кўра Россия бюджетининг катта қисми ҳисобланади. Brent маркасидаги нефть нархи июнь ойининг бошидаги энг юқори нархидан тахминан 25 фоизга тушди.
Россиянинг Молия вазирлиги ҳукумат идораларига 2023 йилда харажатларни 10 фоизга қисқартириш кераклигини билдирди. Бироқ мудофаа харажатлари ошиши кутилмоқда.
Россия президенти Владимир Путин иқтисодий муаммоларни инкор этиб, мамлакат ташқи босимларга ишонч билан дош бераётганини айтган.
Изоҳ (0)