Ўзбекистонда вилоят, туман, шаҳар ҳокими лавозимини эгаллаб турган шахс бир вақтнинг ўзида тегишли халқ депутатлари Кенгаши раиси лавозимини эгаллаши тақиқланиши кутилмоқда. Бу ҳақда Олий Мажлис Қонунчилик палатаси депутати Одилжон Тожиев маълум қилди.
Унинг қайд этишича, Конституциянинг 99-моддасига қуйидаги мазмундаги янги қисм киритилиши таклиф этилмоқда: «Вилоят, туман, шаҳар ҳокими лавозимини эгаллаб турган шахс бир вақтнинг ўзида тегишли халқ депутатлари Кенгашининг раиси лавозимини эгаллаши мумкин эмас».
Одилжон Тожиев август ойининг бошларида Twitter’да ташкил этилган аудиочатда амалдаги Конституцияда ҳокимларга маҳаллий кенгаш раислигининг юкланиши — кафолатланган депутатлик ўрнини келтириб чиқараётганини айтиб ўтганди.
«Тан олиб айтиш керак, бир пайтлар бу нарса керак бўлган, аммо ҳозирги кунда у ўз долзарблигини йўқотди. Ижтимоий тармоқларда ҳам бу бўйича кўплаб эътирозлар билдирилди, яъни ҳоким қандай қилиб ўзи ҳисобот берувчи органга раҳбарлик қилиши, содда қилиб айтганда, у ўзига ўзи ҳисобот бериши мумкин? Конституциядаги шунга ўхшаш мантиққа зид ҳолатларга барҳам берилмоқда», — деган эди у.
Шунингдек, амалдаги Конституциянинг 112-моддасига ҳам янги қисм қўшилиши кўриб чиқилмоқда. Унга кўра, давлат судьянинг ва унинг оила аъзоларининг хавфсизлигини таъминлайди.
Изоҳ (0)