Россия ва Хитой ташқи ишлар вазирлари Сергей Лавров ва Ван И Бирлашган Миллатлар Ташкилоти Бош Ассамблеясининг 77-сессияси доирасида учрашди. Йиғилишда Ван И Россия БМТдаги ролини давом эттириши кераклигини айтди.
«БМТ биноси Қўшма Штатларда жойлашган бўлса-да, ташкилот барчамизга тегишли. Россия БМТ Хавфсизлик кенгашининг доимий аъзоси ва ундаги муҳим ролини давом этиши керак. Ҳеч ким Россияни бу ҳуқуқдан маҳрум қила олмайди», — деди Ван И. Унинг қўшимча қилишича, Хитой қўшма лойиҳалар устида ишлашни давом эттиришга тайёр.
Суҳбат чоғида икки давлат вакиллари Украинадаги вазиятнинг ривожланишини ҳам муҳокама қилди, деб хабар берди Россия ТИВ. Вазирлик баёнотида айтилишича, томонлар Вашингтоннинг бузғунчи ташқи сиёсатини, хусусан, Тайван бўғозидаги провокацион фаолиятини кескин танқид қилган, шунингдек, Украина, Афғонистон, Корея яримороли атрофидаги вазият, ядро қуролини тарқатмаслик режимига риоя қилиш каби мавзуларга тўхталган.
БМТ Хавфсизлик кенгашига 15 та давлат аъзо — улардан 5 таси доимий, 10 таси доимий эмас. АҚШ, Россия, Хитой, Буюк Британия ва Франция кенгашнинг доимий аъзоларидир. Улар вето ҳуқуқига эга. АҚШ ва Франция БМТ Хавфсизлик кенгашининг доимий аъзолари сонини кенгайтириш тарафдори. Хавфсизлик кенгаши ислоҳоти муҳокамаси Россия қўшинлари Украинага кирганидан кейин бошланди.
Изоҳ (0)