Telegram мессенжерида ўтказилган сўровда «Ўзбек тилини қай даражада биласиз?» деган саволга респондентларнинг 93 фоизи «Эркин ёзаман ва сўзлашаман» деб жавоб берди. Бу ҳақда «Юксалиш» умуммиллий ҳаракатининг жамоатчилик фикрини ўрганишга қаратилган сўров каналида маълум қилинди.
Сўров иштирокчиларининг 4 фоизи ўзбек тилида эркин сўзлашиши, лекин хато билан ёзиши маълум бўлди. Бир фоиздан респондентлар маиший даражада мулоқот қилиши, ўзбек тилида оғзаки сўзлашганда тушуниши, аммо гапиролмаслиги, ўзбек тилини билмаслигини таъкидлаган.
Шу билан бирга, «Лотин ёзувига асосланган ўзбек алифбосини қанчалик биласиз?» деган саволга респондентларнинг 87 фоизи «Эркин ўқийман ва ёзаман» деб жавоб берди.
Сўров иштирокчиларининг 3 фоизи лотин ёзувига асосланган ўзбек алифбосидаги матнларни қийналиб ўқиши ҳамда 2 фоизи лотин алифбосида ёзолмаслиги ва ўқий олмаслиги маълум бўлди. 7 фоиз респондентлар ўқишини, лекин хато билан ёзишини таъкидлаган.
Изоҳ (0)