Қашқадарё вилоятининг Яккабоғ туманидаги 75-умумтаълим мактаби балансидаги ер участкалари кўп қаватли турар жой биноси қуриш учун ажратилиб, асоссиз равишда бегоналаштирилиб, талон-торож қилингани аниқланганди. Ҳолатга Қашқадарё вилояти халқ таълими бошқармаси муносабат билдирди.
Қайд этилишича, ҳолат вазирнинг Назорат-ҳуқуқий хизмати ва Қашқадарё вилояти халқ таълими бошқармаси масъуллари иштирокида атрофлича ўрганилди.
Ўрганиш жараёнида Яккабоғ туманидаги 75-сонли умумтаълим мактаби ҳудудидаги 89 сотих ер майдони туман ҳокимининг тегишли қарорлари билан «Буюк Турон Чинор» ва «Юқори сифат инновацион» қурилиш МЧЖларга президентнинг 2018 йил 5 сентябрдаги «Халқ таълими тизимига бошқарувнинг янги тамойилларини жорий этиш чора-тадбирлари тўғрисида» ги қарори талабларига зид равишда кўп қаватли бино қуриш учун ажратиб берилгани аниқланган.
Мазкур ҳолат юзасидан мактаб директори Ф.С. томонидан Яккабоғ тумани халқ депутатлари кенгаши ва туман халқ таълими бўлими мудири Узоқ Нурматов номига ариза йўллаб мурожаат қилган. Халқ таълими бўлимида ижро қилиш қурилиш эксплуатация хизмати бошлиғи М.С.га юклатилган.
Бироқ М.С. масъулиятсизликка йўл қўйиб, мурожаат ижросини таъминламай, таълим муассасасининг 89 сотих ер майдони ноқонуний равишда ўзлаштирилгани юзасидан келган мурожаатни Қашқадарё вилояти халқ таълими бошқармаси қурилиш бўлимига тақдим этмасдан, ҳолатни яширган.
Шунингдек, мазкур мурожаат халқ таълими бўлими Жисмоний ва юридик шахсларнинг мурожаатлари билан ишлаш бўйича мутахассис Ж.I. (ҳозирда бошқа бўлимнинг бошқа тармоғида фаолият юритади) назоратидан четда қолган.
Ўрганиш натижалари юзасидан халқ таълими бўлими мудири Узоқ Нурматовнинг 15 сентябрдаги буйруғи билан Ж.I. ва М.С.га Меҳнат кодексининг 181-моддаси биринчи қисм 1-бандига мувофиқ ҳайфсан интизомий чораси қўлланган.
Айни пайтда ҳолат юзасидан Жиноят кодексининг 205-моддаси билан жиноят иши қўзғатилиб, дастлабки тергов ҳаракатлари олиб борилмоқда.
Маълумот учун, президентнинг «Халқ таълими тизимига бошқарувнинг янги тамойилларини жорий етиш чора-тадбирлари тўғрисида» 2018 йил 5 сентябрдаги қарорининг 10-банди билан умумтаълим ва мактабдан ташқари муассасаларнинг ер участкалари ва кўчмас мулкини Халқ таълими вазирлиги билан келишмасдан бегоналаштириш тақиқланган.
Шунингдек, президентнинг 2021 йил 17—18 июнь кунлари Андижон вилоятига ташрифи давомида берилган топшириқлар ҳамда ўтказилган йиғилиш баёнининг 91-бандида ижтимоий соҳа (таълим, соғликни сақлаш, спорт, маданият муассасалари) объектлари ва ер участкалари ушбу соҳалардан ташқари бошқа мақсадлар учун юридик ва жисмоний шахсларга берилиши тақиқланган.
Изоҳ (0)