Россияда сафарбарлик эълон қилинишига қарши «Change.org» сайтига жойланган петицияни ўн минглаб одам имзолади. Айни пайтга қадар у қарийб 70 мингта имзо тўплади.
«Биз, Россия фуқаролари, аёллар ва эркаклар умумий ва қисман сафарбарликка қарши чиқамиз. Президент Путинда уни эълон қилиш учун қонуний асослар, оқилона ва фактларга асосланган сабаблар йўқ ва бўлиши ҳам мумкин эмас. Жорий ноаниқлик вазиятида биз мамлакатимиз эркаклари — ака-укаларимиз, ўғилларимиз, эрларимиз, оталаримиз ва боболаримизни на маънавий, на ахлоқий, на жисмоний хавфга дучор қилишни истамаймиз», — дейилади петиция матнида.
Петиция 2022 йил апрелида эҳтимолий сафарбарлик ҳақидаги миш-мишлар фонида эълон қилинган эди. Бу хабарлар тасдиқланмаганидан кейин муаллифлар имзо йиғиш муддатини бутун «махсус ҳарбий операция» даври учун узайтиришга қарор қилди. Майга келиб, уни 50 минг киши имзолади.
Эслатиб ўтамиз, бугун, 21 сентябрь куни Путин Россияда қисман сафарбарлик эълон қилиш ҳақидаги фармонни имзолади.
Унинг айтишича, муддатли ҳарбий хизматга фақат ҳозирда захирада бўлганлар, биринчи навбатда, Қуролли Кучлар сафида муддатли ҳарбий хизматни ўтаган, муайян ҳарбий мутахассислик ва тегишли тажрибага эга бўлган фуқароларгина чақирилади. Шунингдек, муддатли ҳарбий хизматга чақирилганлар бўлинмаларга жўнатилишдан олдин «махсус ҳарбий операция» учун қўшимча ҳарбий тайёргарликдан ўтади.
Сафарбарлик тадбирлари 21 сентябрь куни бошланади. Путин ҳудудлар раҳбарларига «ҳарбий комиссарликлар иши учун зарур барча ёрдамни кўрсатишни» буюрди.
Россия мудофаа вазири Сергей Шойгунинг айтишича, қисман сафарбарлик чоғида 300 минг захирадаги аскар чақирилади. Унинг сўзларига кўра, бу Россия сафарбарлик ресурсининг тахминан 1 фоизини ташкил қилади.
Вазирнинг аниқлик киритишича, захирада бўлган Россия фуқаролари чақирилади, талабаларни сафарбарлик қилиш ҳақида гап бормаяпти, шунингдек, чақириқ бўйича хизмат ўтаётганлар ҳам сафарбар этилмайди.
Изоҳ (0)