Бухоро нефтни қайта ишлаш заводида ишлаб чиқарилган Аи-92 русумли автобензин нархи арзонлаштирилди. Бу ҳақда 11 август куни “Ўзбекнефтгаз” матбуот хизмати хабар берди.
Маълум қилинишича, ушбу заводда ишлаб чиқарилган Аи-92 русумли автобензиннинг биржа савдоларидаги 1 тоннаси бошланғич нархи биринчи босқичда 12 млн 881 минг сўмдан 12 млн 628 минг сўмга туширилди. Бу 1 литр Аи-92 русумидаги автобензиннинг биржадаги бошланғич нархи 9 400 сўм дегани.
“Давлат раҳбарининг аҳолини арзон ва сифатли ёқилғи маҳсулотлари билан таъминлаш бўйича берган топшириқлари ижроси доирасида Бухоро нефтни қайта ишлаш заводида Аи-92 русумли автобензин нархини босқичма-босқич пасайтириш ишлари олиб борилмоқда. Бу “Ўзбекнефтгаз” АЖнинг ёқилғи бозори барқарорлигини сақлаш, аҳолини юқори сифатли бензин билан таъминлашга қаратилган стратегиянинг муҳим қисми ҳисобланади”, дейилади компания хабарида.
Қайд этилишича, бензин нархи пасайиши ишлаб чиқариш ҳажмини ошириш ва таннархни камайтириш орқали амалга оширилди. Ички бозорни ривожлантириш ва истеъмолчилар манфаатларини қўллаб-қувватлаш мақсадида юқори октанли ёқилғи нархларини босқичма-босқич пасайтириш ишлари давом эттирилади.
“Ўзбекнефтгаз” 2025 йил сентябрдан Аи-80 бензини ишлаб чиқаришни тўлиқ тўхтатмоқчи. Компания жорий йилнинг ўзида Аи-80 русумли автобензин тизим корхоналари омборларида тўлиқ тугатилишини, 2026 йилдан фақат юқори октанли автобензин сотишга ўтилишини режа қилган.
Изоҳ (0)