Мадриднинг “Реал” клуби 2025 йилги “Олтин тўп” мукофотига номзод бўлган футболчиларини на ижтимоий тармоқларда, на клуб телеканали орқали табриклади. COPE нашри журналисти Сиро Лопеснинг ёзишича, бунга клубнинг ўтган йилги маросимдан сўнг мукофотга бўлган ишончини йўқотгани сабаб бўлган.
Бу орқали “Реал” ўтган йилги натижалардан кейин мукофот ташкилотчиларига бу совринга ишонмаслигини билдирган, дейди Лопес.
Хабарда қайд этилишича, “қаймоқранглилар” келгуси йилларда ҳам ўз футболчилари номзодлар рўйхатига киритилган тақдирда ҳам, айни шу позициясида қолиши мумкин.
2025 йилги “Олтин тўп” мукофотига “Реал”дан Винисиус Жуниор, Килиан Мбаппе ва Жуд Беллингем номзод сифатида кўрсатилган. Худди шундай ҳолат “Лев Яшин” мукофоти учун курашаётган Тибо Куртуа ҳамда “Копа” соврини учун номзод бўлган Дин Хейсен билан ҳам юз берди.
Бу совуқ муносабатлар ортида бошқа омиллар ҳам бор. Хусусан, клуб президенти Флорентино Перес Суперлига лойиҳасини бошлаганидан буён УЕФА билан муносабатлари совуқ тус олган.
“Реал Мадрид” ҳурмат қилинмайдиган жойга бормайди, дея клуб вакили вазиятни изоҳлаган.
Эслатиб ўтамиз, “Реал” делегацияси 2024 йилги “Олтин тўп” маросимида қатнашмаган эди. Ўшанда мукофот Испания терма жамоаси ва “Манчестер Сити” ярим ҳимоячиси Родриго билан топширилган, Винисиус Жуниор эса иккинчи ўринни эгаллаганди.
Изоҳ (0)