Исроил бош вазири Яир Лапид ва Туркия президенти Ражаб Тоййиб Эрдўғон Нью-Йоркда Бирлашган Миллатлар Ташкилоти Бош Ассамблеяси доирасида учрашди. Бу ҳақда Исроил бош вазири канцеляриясининг матбуот котиби Ориф Генделман маълум қилди.
Бу икки давлат етакчиларининг 2008 йилдан бери илк учрашув бўлди. Бунга қадар Туркия ва Исроил дипломатик муносабатлари тикланиб, элчиларнинг иш жойига қайтиши эълон қилинганди.
Лапид ва Эрдўғон умумий, жумладан, Исроилдаги терроризмга қарши кураш мавзусини муҳокама қилди. Исроил бош вазири Туркия президентига Эроннинг терактларга уринишлари пайтида разведка хизматлари билан ҳамкорлик қилгани учун миннатдорлик билдирди.
Бундан ташқари, Лапид Фаластиннинг ҲАМАС ҳаракати қўл остидаги бедарак йўқолган ва асирга олинган исроилликлар ва уларнинг ватанга қайтиши масаласини кўтарди.
Уларнинг суҳбати мавзулари орасида иқтисодий ва энергетика соҳасидаги ҳамкорлик, минтақадаги вазият, шунингдек, Исроилдан Туркияга парвозларни қайта тиклаш масалалари ҳам бўлган ва бунинг учун Лапид Эрдўғонга миннатдорлик билдирган.
2010 йил май ойида Ғазо қирғоқлари яқинида рўй берган можародан сўнг Исроил ва Туркия дипломатик алоқаларини деярли узган эди. Ўшанда Исроил қуролли кучлари Ғазо секторига ёрдам етказаётган Мави Мармара кемасига ҳужум қилди. Кемада жанг бошланиб, тўққиз нафар турк фуқароси ҳалок бўлган, бир неча Исроил аскари яраланган. Исроил ҳукумати ҳодиса учун узр сўрашдан бош тортган ва Туркияни терроризмни қўллаб-қувватлашда айблаган.
Изоҳ (0)