Ижтимоий тармоқларда янги ўқув йилининг бошланиши билан мактаб дарсликларининг ижара нархлари ва дарсликларнинг мазмуни кенг муҳокама қилинди. Муҳокамаларда фаол бўлган тармоқ фойдаланувчилари дастлаб дарсликларнинг ижара нархлари қимматлиги, кейинчалик мазмуни жудаям саёз эканини, бугунги кун ўқувчисига тўғри келмаслигини гапирди.
«Дарё» мазкур фикрларга жавобан президентга мурожаат йўллаган мактаб дарсликлари муаллифларини суҳбатга тортди.
Суҳбат жараёнида, 1, 2 ва 3-синфлар учун она тили дарсликлари муаллифи Шокир Турсун танқидларга қуйидагича муносабат билдирди:
«Ўзбек тили дарслигига тадбиркор Мурод Назаровнинг киритилиши жуда кўп гапирилди ва ҳамон гапирилмоқда. Мазкур дарслик муаллифи эмасман. Тил ўқитиш йўналишида мутахассис бўлганим учун фикримни айтиб ўтаман. Тилда аутентик, яъни ҳаётда мавжуд бўлган, оргинал матн олинади.
Дарсликда бирор нарсани ичидан тўқиб ёзиш самарасиздир. Муаллиф мавжуд материаллардан фойдаланади. Мавзуни кузатганимда кўрдимки, муаллифларга шу услубдаги матн керак бўлган ва Мурод Назаровни танлаган. Улар дарсликка Билл Гейтс ёки Илон Маскни киритиши мумкин эди, лекин ўзбек инсонни маъқул кўрди.
Бу ерда ҳеч қанақа муаммо йўқ. Агар у ерда Murad Building компанияси шуғилланадиган ишлар ҳақида маълумот бўлган-да, бу реклама ҳисобланар эди. Дарсликда бундай маълумот ҳам йўқ. Одамларга нимаси ёқмаётганини тушинмаяпмиз», —дея изоҳлади.
Табиий фанлар дарсликлари муаллифи Севара Ҳасанованинг фикрларига кўра, ҳар бир дарслик ўз даврида энг зўри бўлган.
«Китобни, дарсликни ёмонлаш бу — хато. Бугунги ўқувчи кечаги ўқувчи эмас. Бугунги ўқувчи кечаги дарсликни ўқишга бироз зерикади ва ундан-да, қизиқроқ бўлган маълумотларни қидиради.
Ижтимоий тармоқлар, жумладан, YouTube ва интернет сайтларида дарсликда йўқ, лекин жудаям қизиқарли бўлган маълумотлар бор. Ўқувчи айнан интернет саҳифаларидан қидирмасин, дарсликка кўпроқ эътибор берсин деган мақсад билан жамоа бўлиб ҳаракат қилганмиз», — дейди у.
Яна бир суҳбатдош, 6, 7, ва 10-синфлар учун она тили дарсликлари муаллифи Мансур Сиддиқов жамаотчилик томонидан янги она тили дарсликларидан топилаётган хатоликларни изоҳлаб, қуйидагиларни айтиб ўтди.
«Мазмун жиҳатидан эътирозлар бор. Масалан, 10-синф она тили дарслигининг I бобида келтирилган мавзуга нисбатан ‘Она тили дарслигида нега муҳаббат мавзуси бериляпти? Бу болалар фикрини чалғитади’ деган фикрлар билдирилмоқда.
Эътибор бериш лозимки, биринчидан, 10—11-синфда болалар ўзи она тили ўқийдими? Реал олиб қарайлик, 10—11-синфда болалар деярли ўқишмайди ҳам. Фақат унверситетга тайёргарлик кўраётганлар тилшунослик қисмидан фойдаланади, аммо дарсга кирсангиз болалар умуман ўқимаётганини кўрасиз. Ўқувчиларнинг ёшига ва ҳозирги замонга мос мавзу топиш керак эди.
Иккинчидан, 10-синф болалари 16—17 ёшда бўлади. Уларга ҳозир муҳаббат ҳақида гапирмасак, қачон гапирамиз? Муҳаббат мавзуси деганда, халқ муҳаббат деганда тушунадиган нотўғри тасаввурлар ҳақида гап йўқ, лекин мавзу қизиқ. Бизнинг ҳаётимизда учраётган нарсалар бор», — дейди дарслик муаллифи.
«Дарё» мактаб дарсликлари мазмунига бўлаётган эътирозлар билан боғлиқ муаммоларни ўрганишда давом этади.
Изоҳ (0)