АТБ «Агробанк» «Дарё» нашри ва сайт журналисти Отабек Қўлдошевни нохолисликда айблаб, судга бергани ҳақида хабар берилганди. Мазкур суд икки томон келишуви билан якунланди. Бу ҳақда суд жараёнида иштирок этган «Дарё» мухбири хабар берди.
«Агробанк» сайт журналисти Отабек Қўлдошев муаллифлигидаги «Қашқадарёлик тадбиркор банклардан ярим миллиарддан ортиқ маблағини ололмагач, аҳолига тарқатилган чорва молларини тортиб олмоқда» сарлавҳали мақолага эътироз билдириб, «мақола банкнинг ишчанлик фаолиятига путур етказди, молия бозоридаги ҳуқуқ ва манфаатларининг бузилишига олиб келди», дея журналист ва таҳририятни судга берганди.
Мазкур жараёнга муносабат билдирган нашр банк масъулларига мақолада айнан банкнинг ишчанлик фаолиятига путур етказган, молия бозоридаги ҳуқуқ ва манфаатларининг бузилишига олиб келган қисмини кўрсатишни, шундан сўнг мазкур мақолага раддия берилишини билдирганди.
АТБ «Агробанк» даъво аризасига кўра 2022 йилнинг 30 август куни соат 10:30 да Фуқаролик ишлари бўйича Мирзо Улуғбек туманлараро судида бошланган суд 2022 йилнинг 16 сентябрь куни яна «Агробанк» таклиф қилган келишув битими билан якунига етди.
АТБ «Агробанк» мазкур масалада келишувга эришишни, суд жараёнига якун ясаш таклифини бергач, таҳририят таклифни қўллаб-қувватлади.
Келишув битимига кўра, сайт АТБ «Агробанк» билан боғлиқ мақолаларни эълон қилишдан аввал банк масъуллари фикрини ўрганиш, уларни айблаётган томоннинг важлари қай даражада ҳақли эканини билиш мақсадида журналистик сўров юбориш мажбуриятини, банк масъуллари эса «Дарё» сўровига тезкор равишда жавоб бериш мажбуриятини олди.
Изоҳ (0)