Ноқонуний такси ҳайдовчилари провокация уюштирмоқда — Uzbekistan Airports

Тошкент халқаро аэропортида расмий такси хизмати иш бошлаганидан сўнг ноқонуний такси ҳайдовчилари бир неча марта провокациялар уюштирди. Бу ҳақда Uzbekistan Airports матбуот хизмати хабар қилди.

Маълум қилинишича, 12 сентябрь куни бундай такси ҳайдовчиларидан бири аэропорт ҳудудига киритмагани учун қўриқчини урган. 14 сентябрь куни такси ҳайдовчилари расмий такси хизмати автомобиллари терминалга кириш йўлини тўсиб қўйиб, аэропорт раҳбариятидан ўзларига бепул тўхташ жойи ташкил қилишни ёки фаолиятини давом эттиришлари учун олд ҳудудга киритишни талаб қилган.

«Аэропорт ходимлари бу масалада қатъий эди, ҳуқуқ-тартибот идоралари вакилларини чиқариб, такси ҳайдовчиларига нисбатан чоралар қўллаш ва аэропорт ҳудудида жамоат тартибини таъминлаш ҳақида ариза ёзди», — дейилади хабарда.

Uzbekistan Airports акциядорлик жамияти бошқаруви раиси Раъно Жўраеванинг таъкидлашича, аэропортларда такси ҳайдовчилари билан боғлиқ муаммо дунёнинг кўплаб мамлакатларида бўлган ва ҳозир ҳам мавжуд. Аэропортда қатъиян тақиқланган газда юрадиган эски машиналар, қиммат нархлар, қўпол ҳайдовчилар бўлишига йўл қўйиб бўлмайди.

«Биз бундай машиналарнинг учиб келиш терминали зинапоясигача ҳаракатланишига рухсат бера олмаймиз. Бу нафақат мамлакатнинг салбий имижи, балки йўловчилар хавфсизлигига таҳдиддир. Муаммонинг ягона ечими — расмий такси хизматига ўтиш – бу жаҳон амалиёти», — дейди у.

Компания раҳбарининг алоҳида таъкидлашича, аэропортдаги расмий такси шаҳардаги такси каби нархда бўлмаслигини тушуниш керак, чунки у бензинда юради, юқори сервисга эга ва фақат аэропортга хизмат кўрсатади. «Бироқ шу билан бирга, биз йўловчиларни танлов ҳуқуқида чекламаймиз. 100 метрдан кейин сиз бошқа ҳар қандай таксига ўтиришингиз мумкин», — дейди Раъно Жўраева.

« ‘Хира киракашларъга келсак, албатта, бу масала кунда ҳал бўлмайди. Афсуски улар ҳали ҳам бор ва маълум вақт давомида бўлади. Лекин биз улар билан нафақат Тошкентда, балки вилоятларда ҳам охиригача курашиш ниятидамиз. Муҳими, ҳозир бизни ҳуқуқ-тартибот идоралари қўллаб-қувватласа. Аэропорт муаммони бир ўзи ҳал қилолмайди», — дея қўшимча қилган бошқарув компанияси раҳбари.