АҚШнинг Принстон университети бепул таълим дастурини эълон қилди

АҚШнинг Нью-Жерси штатида жойлашган, Американинг энг нуфузли олий таълим муассасаларидан бири Принстон университети оилавий даромади 100 минг доллардан ошмайдиган талабалар учун ўқиш бепул бўлишини эълон қилди. Бунгача фақат ота-онаси йилига 65 минг доллардан кўп даромад олмайдиган талабаларгина бепул таълим оларди.

Бундан ташқари, оилавий даромади 150 минг доллардан ошмайдиган талабалар махсус стипендияга даъвогарлик қилиши мумкин, у таълим харажатларининг бир қисмини қоплайди. «Чирмовуқ лигаси» (The Ivy League — АҚШда жойлашган, юқори сифатли таълим берилиши билан ажралиб турувчи саккизта хусусий университетлар уюшмаси)га кирувчи Принстон университетида ўқиш йилига 80 минг долларгача тушиши мумкин. CNN хабарига кўра, ушбу университетнинг қарийб чорак қисмигина бепул ўқиши мумкин бўлади.

Талабалар таълим учун олган кредитларини ўқиш тугаганидан кейин банкларга қайтариши керак бўлади, бу уларнинг зиммасига оғир юк бўлиб тушмоқда. Август охирида АҚШ президенти Жо Байден ушбу қарзларни тўлаш имкониятига эга бўлмаганлар учун молиявий кўмак режасини тақдим этди.

Принстон университети 1746 йилда Нью-Жерси коллежи сифатида ташкил этилган. Унинг ўқитувчилари ва битирувчилари орасида 75 нафар Нобель мукофоти, 16 нафар Филдс мукофоти ва 16 нафар Тюринг мукофоти совриндорлари, икки нафар АҚШ президенти ва 12 нафар АҚШ Олий суди аъзолари бор.