«Кўпчилик ўқитувчилар мактаб директорига қарши чиқолмайди» — Андижонда ўқитувчилар мажбурий меҳнатга жалб қилингани айтилмоқда

Андижон вилоятининг Олтинкўл туманида жойлашган 2-умумий ўрта таълим мактабида мажбурий меҳнатга йўл қўйилгани айтилмоқда. «Дарё» таҳририятига келиб тушган маълумотларга кўра, ўқитувчилар мактаб маъмурияти томонидан 1—4 сентябрь кунлари таъмирлаш ишларига жалб қилинган.

Эслатиб ўтамиз, президент фармонига мувофиқ, 1 сентябрь (пайшанба) — Мустақиллик байрами куни, 2 сентябрь (жума) — қўшимча дам олиш куни, 3 сентябрь (шанба) — 6 кунлик иш ҳафтасидаги ходимлар учун қўшимча дам олиш куни ва 4 сентябрь (якшанба) — умумий дам олиш куни деб белгиланган эди.

Мактабнинг бир нечта ўқитувчиси «Дарё» мухбири билан суҳбатда мактаб маъмурияти ўқув йили бошида хоналарни дарсга тайёрлаш учун муаллимларни чақириб, ишлатганини тасдиқлади.

«Кўпчилик ўқитувчилар мактаб директорига қарши чиқолмайди. Агар кимдир айтганини қилмаса, унинг дарс соатини камайтиришга, ҳужжатларидан камчилик топишга киришиб кетади», — деди ўқитувчилардан бири.

Яна бир ўқитувчининг гувоҳлик беришича, у мактаб директорининг ноқонуний талабларини бажармагани боис уни таъмирлаш ишларига чақирмайди.

«Менга ортиқча иш буюролмайди. Айтса ҳам, қилмайман. Ўқув йили бошланишидан аввал нарсаларимни кўздан кечириш учун мактабга борганимда бошқа устозларнинг ишлаётганини кўрдим. Бундай ҳолатлар мактабимизда кўп бўлади», — деди мактаб ўқитувчиси.

Мактаб ўқитувчилари учун очилган Telegram-каналидан олинган скриншотларга кўра, 1 сентябрь — Мустақиллик байрами куни ҳам ўқитувчилар чақириб олинган.

Ўқитувчилар гуруҳида ФНА номли саҳифа эгаси «Мустақиллик куни билан ҳаммани. Мактабга келинглар энди», деган ёзув қолдирилган. Унинг остидан бошқа бир ўқитувчи таъмирлаш жараёнидан расм жойлаган.

Мактаб директорининг ўринбосари Сардорбек Усмонов 3 сентябрь куни гуруҳга ўқитувчилар 4 сентябрь — якшанба куни мактабга ишга чиқишларни ва бу директор топшириғи эканлигини ёзиб қолдирган.

«Ҳурматли устозлар, эртага шанба куни ҳамма дам олади. Якшанба куни ҳамма ишга келар экан, директор топшириғи», дея хабар қолдирган директор ўринбосари.

«Дарё» мухбири мактаб директори ўринбосари Сардорбек Усмонов билан боғланиб, ҳолатга изоҳ сўраганида, у якшанба куни уйда бошқа юмуш билан банд бўлганини айтган.

Ўқитувчилар жамоасининг Telegram-гуруҳида Дилором номли саҳифа эгаси (мактаб директори Дилором Йўлдошева) 4 сентябрь куни «Инсофларинг йўқ экан. Эртага биринчи кунлиги эсларингдан чиқди, шекилли», деб ёзган.

Ҳолатга изоҳ олиш мақсадида «Дарё» мухбири бир неча кун давомида мактаб директори Дилором Йўлдошевага қўнғироқ қилган, аммо у жавоб бермаган.

«Дарё» воқеалар ривожини кузатиб боради.