2022 йил июль ойида Россиядан АҚШга қора металлар импорти деярли нолга тушди. Бу ҳақда АҚШ аҳолини рўйхатга олиш бюроси маълумотларига таяниб, «РБК» хабар бермоқда.
Маълум бўлишича, июль ойида АҚШ Россиядан 600 минг долларлик қора металл сотиб олган. Июнь ойида бу кўрсаткич 201 миллион долларни ташкил қилган эди.
2021 йилда Россиядан қора металлар етказиб беришнинг 9 фоизи АҚШ ҳиссасига тўғри келган эди.
Ўтган йили АҚШ Россиядан 2,77 миллиард долларлик (ойига ўртача 230 миллион доллар) қора металлар импорт қилган.
Қора металларни харид қилиш 7 апрель куни АҚШ Россиядан савдодаги энг қулай давлат мақомини олиб ташлаганидан кейин камайди. Июнь ойида пўлат ва бир неча турдаги пўлат маҳсулотларига импорт тарифи 35 фоизгача кўтарилди.
Апрель ойидан бери санкциялар ва тарифлар қўлланмаган металлар етказиб бериш ҳам камайди. Россиянинг платина гуруҳи металларининг (палладий, платина, родий) АҚШга импорти июль ойида 34 миллион долларни ташкил этди.
Бу эса июнь ойидаги 76 миллион доллар ва май ойидаги 258,5 миллион долларга қараганда анча кам. Дунё бўйлаб бирламчи палладий етказиб беришнинг қарийб 40 фоизи Россия ҳиссасига тўғри келади.
Ҳиндистон июнь ва июль ойларида Россиядан пўлат харид қилишни оширди. Ҳиндистон божхона маълумотларига кўра, июль ойида Россиядан қора металлар (ТНВЕД 72) импорти йиллик кўрсаткичларда беш бараварга ўсди — 29,7 минг тоннагача.
Изоҳ (0)