Нима учун «Дунё гўзали» ва маҳоратли актриса Айшвария Райни ўзи туғилиб ўсган Ҳиндистонда ёқтиришмайди?

Айшвария Рай 1973 йил 1 ноябрда Ҳиндистоннинг Мангалур шаҳрида туғилган. У оиласи жуда бадавлат бўлгани учун ҳам яхши таълим олди. Болалигиданоқ мусиқа, рақс ва санъатга ўзгача меҳр қўйди. Қолаверса, Айшвариянинг ғайриоддий гўзаллиги барчанинг эътиборини ўзига тортар эди, деб ёзади Grazia.

Кейинчалик оила Бомбейга кўчиб ўтди, у ерда Айшвария энг нуфузли ўқишлардан бирига киришга муваффақ бўлди. У ҳамма учун ҳам мавжуд бўлмаган имкониятдан фойдаланди, тилларни (бешта тилни, шу жумладан инглиз тилини) ўрганди ва бу унга келажакда ёрдам берди.

Рай бу вақтда актриса ёки моделлик карьераси ҳақида ўйлаб ҳам кўрмаган. Мактабда у зоологияни яхши кўрарди, шунинг учун у ветеринар бўлишни орзу қилган. Кейинчалик унинг бу соҳага қизиқиши сусайди. Аммо бошқа томондан Айшвария архитектурага кўпроқ эътибор бера бошлади, у бинолар қандай қурилганини томоша қилишни яхши кўрарди. Шундан сўнг меъмор бўлишга қарор қилди. Бироқ унинг режалари амалга ошмади: тақдир унга бошқа соҳани тайёрлаб қўйганди.

Айшвария 18 ёшга тўлганда, моделлик агентлигининг назарига тушди ва улар шартнома имзолашни таклиф қилди. Рай агентлик билан ҳамкорлик қилишга рози бўлди, унинг юлдузли саёҳати мана шу кундан бошланди. Дебют муваффақиятли тарзда ўтди, у карьерасини бошлаганидан бир неча ой ўтгач, биринчи гўзаллик танловида ғолиб чиқди. Кейинчалик унинг сурати American Vogue журналининг муқовасини безади. Шундан сўнг Рай Ҳиндистондаги энг таниқли инсонлардан бирига айланди ва турли брендлардан таклифлар ортиб борди. 2 йилдан кейин Айшвария Pepsi реклама ролигида суратга тушди ва бу уни янада машҳур қилди. Рекламада гарчи у фақат битта сўз айтган бўлса-да, бу томошабинлар учун етарли бўлди.

Дунё гўзали

1994 йилда модель «Ҳиндистон гўзали» танловида иштирок этишга қарор қилди. Бироқ ғалаба Samsҳита Сенга берилди ва Айшвария иккинчи ўринни эгаллади. Муваффақиятсизлик Райга Жанубий Африканинг Сан-Сити шаҳрида бўлиб ўтган халқаро «Дунё гўзали» танловида иштирок этишига тўсқинлик қилмади. Бу сафар унга омад кулиб боқди ва у «Дунё гўзали» унвонини олди.

1997 йилда Айшвария карьерасини ўзгартиришга ва ўзини актрисаликда синаб кўришга қарор қилди. У дастлаб «Жуфтлик» ҳинд фильмида суратга тушди, кейинчалик картина Белграддаги халқаро кинофестивалда «Энг яхши фильм» деб топилди. Муваффақиятли дебютдан сўнг интилувчан актрисага «Улар бир-бирини севади» романтик комедиясида рол ўйнаш таклиф қилинди. Аммо ушбу картина жуда қаттиқ танқид қилинди: сюжет учун ҳам, Айшвариянинг ижроси учун ҳам. Ҳақиқий эътироф унга «Абадий сеники» фильмида суратга тушганидан кейин насиб этди. Ушбу фильм унга «Энг яхши актриса» биринчи кино мукофотини келтирди. Кейинчалик Рай бундан кам бўлмаган муваффақиятли фильмларда иштирок этди: Канн кинофестивалида намойиш этилган «Девдас» мелодрамаси, «Келинлик орзуси ва «Пушти пантера-2».

Айшвариянинг карьераси муваффақиятли давом этди, ўзининг ёрқин гўзаллиги билан Голливудни ҳам забт этди. У Американинг кўнгилочар дастурлари ва ток-шоуларида, шу жумладан, Опра Уинфри шоусида иштирок этди. Рай бирин-кетин реклама шартномаларини имзолади, у Longines ҳамда L’Oreal элчиларидан бирига айланди.

Айшвариянинг шахсий ҳаётида ҳеч қандай муаммо бўлмаган. «Тезлик-2» фильмини суратга олиш майдончасида актёр Абхишек Баччан билан учрашди. Анъанани ҳурмат қилган жуфтлик аввалига ота-онасидан турмуш қуришга рухсат сўради. Ўша пайтда уларнинг тўйи дунёдаги энг шоҳона маросимлардан бирига айланди. 2011 йилда жуфтлик қиз фарзандли бўлди.

Айшвария ўзи орзу қилган ҳамма нарсага эришгандек эди, аммо ҳомиладорлик унинг ҳаётидаги энг қийин даврлардан бирининг бошланиши бўлди. Бу вақтда актриса семириб кетди ва туғуруқдан сўнг ўз қоматини тиклаш учун спорт залида кун-у тунини ўтказмаслигини эълон қилди, чунки у учун биринчи ўринда фарзанди турар эди. Аввалига жамоатчилик Райнинг стереотипларни бузишдан қўрқмаслигига қойил қолган ҳолда юлдузнинг бу қарорини қўллаб қувватлади. Аммо оммавий ахборот воситалари ёш онанинг муваффақиятсиз тушган суратини жойлаганидан сўнг уларнинг фикри кескин ўзгарди.

Бу Райни идеал кўришга одатланган одамларнинг ғазабини келтирди. Мухлислар актрисанинг ташқи қиёфасини кескин танқид қила бошлади ва унга туғуруқдан кейин тезда чиройли қоматга эга бўлган Анжелина Жоли ва Виктория Бекҳэмни ўрнак қилиб кўрсатди. Унга парҳезга ўтиш ва спорт залига боришни тавсия қилишди. Ҳиндистоннинг ғурури ва гўзали тез орада «миллатнинг шармандалиги»га айланди — уни шундай аташди ва ижтимоий тармоқ фойдаланувчилари актрисанинг ташқи кўринишини муҳокама қилишдан уялмади. Бундай салбий руҳдаги шов-шув Айшварияни даҳшатга солди. Вақт ўтиши билан у аввалги кўринишини тиклади, лекин ўзи учун муҳим хулосага келди: муваффақият ва томошабинлар ўзгарувчан. Шунинг учун ҳам Айшвария бошқа оналарни ташқи кўриниш ҳақида эмас, биринчи навбатда фарзандлари ва саломатлиги ҳақида қайғуришга чақиришдан чарчамайди. Ҳозирда актриса ҳинд киносида рол ўйнашда давом этмоқда, лекин аввалгидек кўп эмас, у ўз вақтини имкон қадар оиласига бағишлашга ҳаракат қилади.