Олий Мажлис депутати Расул Кушербаев дарахтлар кесилиши муаммоси ҳақида яна ўз фикрларини билдириб ўтди.
«Кечаги ишлар бўйича икки оғиз. Биламизки, она табиатни асраш, дарахтларни сақлаб қолиш борасидаги ишлар давлат сиёсатининг ажралмас бўлагига айланиб бўлди. Давлатимиз раҳбари ташаббуси билан дарахт кесишга қарши муддатсиз мораторий эълон қилинди, ‘Яшил макон’ дастури йўлга қўйилди.
Демак, қанча қийин бўлмасин, давлатнинг бу борадаги позицияси қатъий ва ўзгармас: мораторий талабларига риоя қилиниши шарт. Ва биз буни тўлиқ қўллаб-қувватлаймиз.
Бироқ кечаги Чилонзор ва Учтепадаги дарахткушлик воқеаси бу талабни амалга ошириш қанчалар қийин эканлигини яна бир бор кўрсатди. Айниқса, жамоатчилик билан баб-баравар экологик қонунчилик ижросини ҳам назорат қилиши керак бўлган прокуратуранинг ишга ёндашуви дастлаб хавотирли туюлди. Шаҳар экология бошлиғини ҳибсга олиб, жамоатчиликнинг норозилигига сабаб бўлган прокуратура якунида ўзи уни озод қилди. Саволлар кўп бўлса-да, ҳарқалай, прокуратуранинг якунда қилган ҳаракати ўз ўрнидаги тўғри ва асосли қарор бўлди, деб ҳисоблаймиз.
Чунки жамоатчилик ҳам, экология ходимлари ҳам давлатимиз раҳбари ташаббуси билан жорий этилган мораторий талабларига риоя этилиши тарафдори.
Умид қиламизки, бундай тушунмовчилик бошқа қайтарилмайди.
Шу ўринда яна бир гапни айтиб ўтиш даркор. Мендаги маълумотлар бўйича, кечаги зиддият Президент администрациясининг аралашуви билан ўз ўрнига тушган.
Президент администрациясининг жамоатчилик билан ишлашдаги янги услуби ва жамоат билан ҳамфикр ҳолда иш ташкил этаётгани шахсан мени қувонтирмоқда, янги ишонч ва ғайрат бермоқда.
Биз бундай ёндашувни қўллаб-қувватлаймиз ва бундан буён ҳам давлат раҳбарининг ташаббуси билан жорий этилаётган талабларни амалга оширишда фаол жамоатчилик назоратини олиб боришда давом этамиз», — деб ёзди депутат.
Изоҳ (0)