Андижонда туман ИИБ профилактика инспектори ҳамшира онасидан иш талаб қилган ҚВП мудирини уриб, унга тан жароҳати етказгани айтилмоқда. Бу ҳақда «Дарё» манбаси хабар бермоқда.
Айтилишича, воқеа 2022 йил 11 сентябрь куни соат 13:00 лар атрофида Андижон шаҳрининг Эски шаҳар ҳудудида юз берган.
Манбанинг маълум қилишича, Халқ депутатлари Андижон туман кенгаши депутати, «Бобоғози» қишлоқ врачлик пункти мудири вазифасида ишловчи Жаҳонгир Қўчқоров профилактика инспектори томонидан етказилган тан жароҳати сабаб Республика шошилинч тез тиббий ёрдам илмий маркази Андижон филиалига ётқизилган.
Таъкидланишича, воқеа юз берган куни эрта тонгда Жаҳонгир Қўчқоров ўзи раҳбарлик қилаётган қишлоқ врачлик пунктида ходимларга умумий йиғилиш ўтказган.
«Йиғилишда барча ходимларга вазифалари тушунтирилиб, уларга топшириқлар берилган. Шунингдек, топшириқларни ўз вақтида бажармасдан беписандлик қилаётганлар жазога тортилиши бўйича огоҳлантирилган. Лекин ҳеч кимни ҳақорат қилмаган. Бироқ у ерда аввал катта ҳамшира, ҳозирда оддий ҳамшира сифатида ишлаб келаётган З.А. ИИБда ишловчи ўғлига қўнғироқ қилиб, мудир жиғига тегаётганлигини айтган. Шунингдек, ўғлига мудирни тартибга чақириб қўйиш кераклигини билдирган.
Аёлнинг ўғли ва унинг шериги ҚВП мудирини ушлаб, ‘Девонабой’ масжиди олдига олиб бориб, таниб бўлмайдиган даражада урган. Унга тан жароҳати етказган. Ҳеч ким ёрдам бермаган», — дейди исмини сир қолишини истаган манба.
Яна бир манбанинг айтишича, ҚВП мудирининг дўппосланишига унинг З.А.дан ишга кеч қолганлиги сабабли тушунтириш хати олгани сабаб бўлиши мумкин.
Соғлиқни сақлаш бошқармаси мутасаддиларининг маълум қилишича, ушбу ҳолат юзасидан ҳуқуқ-тартибот органлари томонидан терговга қадар суриштирув ишлари олиб борилмоқда.
Изоҳ (0)