Қиролича Елизавета II нинг вафотидан кейин унинг ўғли Чарльз III 10 сентябрь, шанба куни расман тахтга ўтиради, деб ёзади «РБК». Аввалроқ маросим 9 сентябрда ўтказилиши хабар берилганди.
Чарльз қироличанинг ўлимидан кейин, собиқ тахт вориси сифатида, автоматик тарзда қиролга айланди. Бироқ, Independent ёзишича, анъанага кўра, Валиаҳдлик бўйича кенгаш томонидан расмий маросим ўтказилиши керак. Унинг иштирокчилари монархнинг вафотидан кейин 24 соат ичида Сент-Жеймс саройида йиғилиши керак.
Шу сафар бу кечроқ амалга оширилади, деб ёзади газета, чунки тайёргарлик учун етарлича вақт бўлмаган. Шу билан бирга Кенгаш қироличанинг ўлимидан кейинги биринчи парламент йиғилишига қадар бўлиб ўтиши керак, ундан эса, ўз навбатида, иложи борича тезроқ йиғилиш талаб қилинмоқда.
Тарихий нуқтаи назардан, Валиаҳдлик бўйича кенгашда монархнинг маслаҳатчиларидан иборат бўлган Махфий кенгашнинг бутун таркиби қатнашади ва янги қиролнинг расман тахтга ўтқизилишини кузатади. Бироқ уларнинг сони 700 дан ортиқ бўлгани сабабли, чекловлар киритилган. Маросимда қатнашиш учун Махфий кенгашнинг 200 нафар аъзоси таклиф қилинган.
Қиролича Елизавета II 96 ёшида Шотландиядаги Балморал қасрида вафот этди. Унгача шифокорлар унинг саломатлиги юзасидан хавотир билдириб, унга кузатув остида қолишни тавсия этган эди.
Унинг ўғли, 73 ёшли шаҳзода Чарльз автоматик тарзда қиролга айланди ва ўзига Чарльз III номини олди.
Букингем саройига ўрнатилган давлат байроғи туширилди, мамлакатда ўн кунлик мотам бошланди.
Изоҳ (0)