АҚШ ҳукумати Украина ва «келажакда Россия потенциал равишда хавф солиши мумкин бўлган» яна 18 та Европа мамлакатига 2 миллиард долларлик қўшимча кредитлар ва кафолатлар ажратишни тасдиқлади. Бу ҳақда АҚШ Давлат департаментининг расмий баёнотида айтилади.
Янги ҳарбий ёрдам ҳақида АҚШ давлат котиби Энтони Блинкеннинг Киевга олдиндан эълон қилинмаган ташрифи фонида маълум бўлди. Энди маблағларнинг ажратилишини Конгресс маъқуллаши керак. Ушбу сумманинг қарийб бир миллиард доллари Украинага берилади, қолган қисмини Албания, Босния ва Герцеговина, Болгария, Хорватия, Чехия, Эстония, Грузия, Греция, Косово, Латвия, Литва, Молдова, Черногория, Шимолий Македония, Польша, Руминия, Словакия ва Словения қўлга киритади.
Бу аввалроқ эълон қилинган, Киев учун 675 миллион долларлик кўмакка қўшимча маблағдир. Давлат департаменти вакили сўзларига кўра, молиявий ёрдам Украина ва унга қўшни 18 мамлакат, шу жумладан, Россия томонидан бўлажак тажовузнинг катта хавфига дуч келаётган НАТО бўйича иттифоқдошлар ва бошқа минтақавий шериклар хавфсизлигини ошириш учун зарурдир.
АҚШ ўтган молия йилида (июнда тугади) Украина ва унга қўшни давлатларга қарийб 4 миллиард долларлик шундай кредитлар ва кафолатлар тақдим этган эди.
8 сентябрь куни Пентагон раҳбари Ллойд Остин Американинг Германиядаги «Рамштайн»ҳарбий базасида Украина бўйича алоқа гуруҳи учрашувида АҚШ президенти Жо Байден Киевга 675 миллион долларлик янги ҳарбий кўмак пакети ажратилишини маъқуллаганини маълум қилганди.
«Бу ўтган йил августидан буён Байден маъмурияти томонидан АҚШ захираларидан Украина учун йигирманчи марта қурол-яроғ етказиб берилишидир», — деди Остин. Унинг сўзларига кўра, янги ҳарбий ёрдам пакети 105 миллиметрли гаубицалар, GMЛРС ўта юқори аниқликдаги реактив снарядлар ва артиллерия ўқ-дориларини ўз ичига олади.
Остин Украинага иттифоқдошлари томонидан берилаётган ҳарбий кўмак ўзини оқлаётганини қайд этди. «Биз саъй-ҳаракатларимиз жанг майдонида аниқ-равшан самара бераётганини кўряпмиз», — деди Пентагон раҳбари. Reuters ҳисоб-китобларига кўра, август охири ҳолатига Америка томонидан Украинага тақдим этилган ҳарбий кўмак суммаси 10,6 миллиард долларга етган.
Изоҳ (0)