Венгрия Евроиттифоқ томонидан уч нафар россиялик бизнесменга қарши киритилган санкцияларни бекор қилиш ҳақидаги талабидан вақтинчалик воз кечади, деб ёзди «РБК».
6 сентябрь куни Politico нашри Евроиттифоқ мансабдорларига таяниб, Брюссель россияликларга қарши чекловларнинг амал қилиш муддатини узайтириши кераклиги, акс ҳолда у тугаши ҳақида ёзганди. Сўнгги муддат — 15 сентябрь. Евроиттифоқ ичида муддатнинг узайтирилиши техник расмиятчилик деб кўрилган бўлса-да, Будапешт санкция рўйхатидан уч нафар россияликнинг чиқариб ташланишини талаб этишга қарор қилди. Икки дипломатнинг сўзларига кўра, гап россиялик бизнесменлар Алишер Усмонов, Пётр Авен ва Виктор Рашников ҳақида бормоқда.
Politico маълумотларига кўра, Евроиттифоқ кенгашида раислик қилувчи Чехия Венгрия билан келишиб олган ва у ушбу учта исм-шарифни муҳокама қилишни кейинги сафарга қолдиришга рози бўлган.
USM Holdings асосчиси, миллиардер Алишер Усмонов 28 февраль куни, Украинада Россия операцияси бошланганидан кейин тўрт кун ўтиб, Евроиттифоқ санкцияларига учраган эди. Бизнесмен Брюсселнинг бу қароридан норози бўлиб, май бошида Европа умумий юрисдиксия судига апелляция берди. У суддан апелляция бўйича якуний қарор қабул қилингунига қадар санкциялар амал қилишини тўхтатиб қўйишни сўради. Усмоновга қарши АҚШ, Канада, Буюк Британия ва Япония ҳам санкциялар киритган.
Май ойининг иккинчи ярмида Усмонов The Times газетаси талқини бўйича Буюк Британиянинг энг бадавлат одамлари ўнлигидан чиқиб кетди.
Изоҳ (0)