Россия бош прокуратураси Санкт-Петербург судига даъво аризаси киритиб, Ленинград қамалини «ҳарбий жиноят ва инсониятга қарши жиноят, совет халқига нисбатан геноцид» деб тан олишни талаб қилди, деб ёзади «РБК».
Идора хабарида айтилишича, шаҳар прокуратура органлари томонидан «ҳуқуқ-тартибот органлари, шунингдек, соҳа мутахассислари билан ҳамкорлик таъминланган. Улуғ Ватан уруши йилларида Ленинград аҳолисининг оммавий қирғин қилиниши ҳолатлари бўйича архив ҳужжатлар ва материаллар ўрганиб чиқилган».
Бош прокуратура маълум қилишича, Ленинград қамал қилиниши чоғида шаҳар аҳолиси, инфратузилма объектлари, шу жумладан, ҳаётни таъминлаш объектлари мунтазам ўққа тутилган ва бомбардимон қилинган, очарчилик юзага келиши учун шароитлар яратилган.
Шу билан бирга, идорада қайд этишларича, Нюрнберг жараёни чоғида Ленинград қамал қилиниши орқали унинг аҳолисининг йўқ қилиниши, шу жумладан, шаҳарда очарчилик юзага келиши учун шароитлар яратилишига ҳуқуқий баҳо берилмаган.
«Ушбу ариза Россия Федерацияси миллий манфаатларини, ноаниқ доирадаги шахслар — қамалга олинган Ленинград аҳолиси, шаҳар ҳудудида ҳалок бўлган тинч фуқароларнинг қариндошлари ва авлодлари қонуний ҳуқуқ ва манфаатларини ҳимоя қилиш, шунингдек, дунё жамоатчилигига Улуғ Ватан уруши йилларидаги истилочилар қурбонлари ҳақидаги маълумотни етказиш мақсадларида Санкт_петербург шаҳар судига киритилфи», — дейилади хабарда.
Ленинград қамали мавзуси 1946 йилда Нюрнберг жараёнида кўтарилган эди. СССР вакиллари 900 кун давомида шаҳарга 100 мингдан ортиқ бомба ташлангани, 150 мингтадан ортиқ артиллерия снарядлари отилганини маълум қилган. Бутун қамал давомида 670 мингдан ортиқ одам ҳалок бўлган. Аммо шаҳарда очарчилик уюштирилгани геноцид деб тан олинмаган, чунки бундай усулда уруш олиб боришга тақиқ Женева конвенциясига кейинроқ киритилганди.
Изоҳ (0)