Vengriya Yevroittifoq tomonidan uch nafar rossiyalik biznesmenga qarshi kiritilgan sanksiyalarni bekor qilish haqidagi talabidan vaqtinchalik voz kechadi, deb yozdi “RBK”.
6-sentabr kuni Politico nashri Yevroittifoq mansabdorlariga tayanib, Bryussel rossiyaliklarga qarshi cheklovlarning amal qilish muddatini uzaytirishi kerakligi, aks holda u tugashi haqida yozgandi. So‘nggi muddat — 15-sentabr. Yevroittifoq ichida muddatning uzaytirilishi texnik rasmiyatchilik deb ko‘rilgan bo‘lsa-da, Budapesht sanksiya ro‘yxatidan uch nafar rossiyalikning chiqarib tashlanishini talab etishga qaror qildi. Ikki diplomatning so‘zlariga ko‘ra, gap rossiyalik biznesmenlar Alisher Usmonov, Pyotr Aven va Viktor Rashnikov haqida bormoqda.
Politico ma’lumotlariga ko‘ra, Yevroittifoq kengashida raislik qiluvchi Chexiya Vengriya bilan kelishib olgan va u ushbu uchta ism-sharifni muhokama qilishni keyingi safarga qoldirishga rozi bo‘lgan.
USM Holdings asoschisi, milliarder Alisher Usmonov 28-fevral kuni, Ukrainada Rossiya operatsiyasi boshlanganidan keyin to‘rt kun o‘tib, Yevroittifoq sanksiyalariga uchragan edi. Biznesmen Bryusselning bu qaroridan norozi bo‘lib, may boshida Yevropa umumiy yurisdiksiya sudiga apellyatsiya berdi. U suddan apellyatsiya bo‘yicha yakuniy qaror qabul qilinguniga qadar sanksiyalar amal qilishini to‘xtatib qo‘yishni so‘radi. Usmonovga qarshi AQSH, Kanada, Buyuk Britaniya va Yaponiya ham sanksiyalar kiritgan.
May oyining ikkinchi yarmida Usmonov The Times gazetasi talqini bo‘yicha Buyuk Britaniyaning eng badavlat odamlari o‘nligidan chiqib ketdi.
Izoh (0)