Албания Эрон билан дипломатик алоқаларни узди
Албания июль ойида юз берган ва Теҳронни айбдор деб ҳисоблаган киберҳужумлардан сўнг Эрон билан дипломатик алоқаларини узди, деб ёзади «Коммерсантъ».
АҚШ НАТО бўйича иттифоқдош сифатида Албанияни қўллаб-қувватлашини билдирди. Эрон эса Албаниянинг киберҳужум бўйича айбловларини «асоссиз даъволар» деб атади.
Албания Эрон дипломатлари ва элчихона ходимларига 24 соат ичида мамлакатни тарк этишни буюрди. «Ҳукумат Эрон Ислом Республикаси билан дипломатик алоқаларни зудлик билан тугатишга қарор қилди», — деди Албания бош вазири Эди Рама ўз видеомурожаатида. Эрон Ташқи ишлар вазирлиги Албаниянинг қарорини қоралади.
АҚШ бир неча ҳафта давом этган суриштирувлардан кейин 15 июль куни Албанияга уюштирилган «бемулоҳаза ва масъулиятсиз» киберҳужум ортида Эрон турибди, деган хулосага келди. Албания ҳукумати маълумотларига кўра, киберҳужум «давлат хизматларини фалажлаб, мамлакатда хаосни юзага келтириш» хавфини яратган.
«АҚШ ўз иттифоқдошининг хавфсизлигига хатар солувчи ва кибермаконда хавотирли прецедент яратувчи ҳаракатлари туфайли Эронни жавобгарликка тортиш учун бундан кейинги чораларни кўради», — дейилади Оқ уй Миллий хавфсизлик кенгаши баёнотида.
