7 сентябрь куни Украина расмийлари август ойида Украина Қуролли кучлари Қримдаги Россия базаларига ракета зарбалари берганини тасдиқлади. «Ягона Россия» бош кенгаши котиби Андрей Турчак Украинанинг босиб олинган ҳудудлари Россия Федерацияси таркибига қўшилиши бўйича референдумларни 4 ноябрь — Миллий бирлик кунида ўтказиш «тўғри ва рамзий» бўлишини айтди.
Украина Қуролли кучлари бош қўмондони Валерий Залужний урушнинг боришини таҳлил қилувчи мақола ёзди. Унинг сўзларига кўра, Украина армиясининг Россиядаги ҳарбий нишонларга зарба бериш қобилияти муҳим аҳамият касб этади. Россия Мудофаа вазирлиги Донецк вилоятидаги Кодема қишлоғи эгалланганини эълон қилди, ушбу ҳудуд учун сўнгги ҳафталарда жанг олиб борилаётган эди.
Украина армиясининг расмий вакиллари украин қўшинлари Харьков вилоятининг Балаклея шаҳрига тўсатдан ҳужум қилгани бўйича изоҳ бермаяпти — бундай маълумотни ҳарбий экспертлар эълон қилган эди. Америка Урушни ўрганиш институти Украина Қуролли кучлари ҳеч бўлмаганда Балаклея яқинидаги Вербовка қишлоғини эгаллаб олган, деб ҳисобламоқда. Meduza урушнинг 196-кунидан асосий фотосуратларни жамлади.
Чернигов вилоятида кечган жанг излари
Лукашовка қишлоғида рус армиясининг вайрон қилинган танки ёнидан ховербордда ўтаётган қиз. Черниговдан 19 километр жанубда жойлашган ушбу аҳоли пункти 10 март куни рус қўшинлари томонидан босиб олинганди. Украина оммавий ахборот воситаларининг ёзишича, руслар қишлоқни танкларда айланиб, чорва молларини ўғирлаган, черковда штаб ўрнатган ва у ерга қурол яширган. 31 март куни Украина қуролли кучлари Лукашовкани озод қилди.Фото: AFP
69 ёшли Татяна рус армияси зарбаларидан вайрон бўлган уйи ёнида. Украина қўшинлари Лукашовкани озод қилганидан сўнг, Repair Together ташкилоти кўнгиллилари қишлоқни тиклашга ёрдам бермоқда. Ушбу ташаббус уруш пайтида пайдо бўлган, унинг мақсади — ҳарбий ҳаракатлар пайтида вайрон бўлган турар жой бинолари ва бошқа объектларни тиклаш.Фото: AFPБаҳмут яқинидаги жанглар
Баҳмут яқинидаги отишмадан кейин кўтарилаётган тутун. Украина Қуролли кучлари бош штабининг сўнгги ҳисоботига кўра, Украина қўшинлари мамлакат назорати остида қолаётган ушбу шаҳарга қараб силжиётган Россия армиясининг ҳужумларини муваффақиятли қайтармоқда.Фото: Reuters
Ўзини ўзи республика деб эълон қилган Донецк халқ республикаси (ДХР) армияси аскари Донецк яқинига жойлаштирилган ўқ-дори қутилари ёнида. Россия ОАВларининг ёзишича, август ойи бошидан бери Украина Қуролли кучлари шаҳарни тўхтовсиз ўққа тутмоқда.Фото: Reuters
ДХР қўшини аъзолари Донецк шимолидаги Авдеевка шаҳри йўналишида «Гиацинт-Б» гаубицасидан ўт очишга тайёрланмоқда. Авдеевка Украина Қуролли кучлари томонидан назорат қилинади. Украина ОАВларининг ёзишича, шаҳар Россия армияси томонидан доимий равишда ўққа тутилмоқда.Фото: Reuters
Краматорск мери Александр Гончаренконинг сўзларига кўра, Россия қўшинлари 7 сентябрь куни эрталаб руҳий касалликлар шифохонасига ҳужум қилган. «Жабрланганлар йўқ, аммо муассасага жиддий зарар етди», — дейди у.Фото: Anadolu
Россия қўшинларининг Краматорскка зарбасидан кейин психиатрия шифохонасида ойна синиқлари билан қопланган каравот.Фото: AP Photo
Славянскка берилган зарба оқибатлари
Ўт ўчирувчилар рус ҳарбийларнинг ҳужуми оқибатида ҳалок бўлган славянсклик фуқаро жасадини олиб кетмоқда. Украина ОАВларининг ёзишича, шаҳар 7 сентябрга ўтар кечаси ўққа тутилган. Мактаб ва турар-жой биносига зарар етган, вайроналар остидан қутқарувчилар 3 кишининг жасадини топди.Фото: AP Photo
Славянскда яшовчи аёллар ўт ўчирувчиларнинг ишини кузатмоқда.Фото: AP Photo
Харьковнинг ўққа тутилиши оқибатлари
Харьковликлар шаҳарга ҳужум оқибатида ҳосил бўлган ўрани томоша қилмоқда. 7 сентябрга ўтар кечаси рус қўшинлари Харьковни ўққа тутди, деди шаҳар раҳбари Игорь Терехов. Саноат туманидаги хусусий уй вайроналари остидан аёл кишининг жасади топилган.Фото: EPA
Харьковнинг Салтовка туманидаги вайрон бўлган кўп қаватли бино — туман рус қўшинлари томонидан тез-тез ўққа тутилади. Шаҳар мери Игорь Тереховнинг айтишича, россияликлар «шаҳарнинг нормал ҳаётини таъминлаш учун муҳим бўлган объектни» уришига бир бахя қолган.Фото: Anadolu
Харьковда вайрон қилинган уйлардан биридаги квартирадан қутқарувчилар олиб чиққан шахсий буюмлар ва болалар ўйинчоқлари.Фото: ZUMA Пресс
Изоҳ (0)