Мўғулистон бош вазири Россиядан Хитойга газ қувури қурилиши ҳақида гапириб берди

Мўғулистон бош вазири Лувсаннамсрайн Оюун-Эрдене Шарқий иқтисодий форум сессиясида нутқ сўзлаш чоғида мамлакат ҳудуди орқали Россиядан Хитойга газ қувури қурилишига тайёргарликнинг бориши ҳақида гапириб берди, деб ёзади «РБК». Унинг сўзларига кўра, ушбу лойиҳа бўйича ишлар 2029 йилгача якунланиши режалаштирилмоқда.

«Биз аллақачон дастлабки техник-иқтисодий асосларни ишлаб чиқдик, уларни ‘Газпром’ раҳбарияти билан батафсил муҳокама қилдик. Яқин келажакда ҳужжатлар лойиҳасини парламентга киритамиз», — деди Мўғулистон бош вазири.

Владимир Путин Хитойга Мўғулистон орқали газ етказиб бериш параметрлари ва ҳатто нархлар ҳам аллақачон келишиб олинганини айтди. «Мўғулистон — бизга дўст бўлган, сиёсий жиҳатдан барқарор мамлакат ва биз бу ерда ҳеч қандай муаммоларни кўрмаяпмиз. Билишимча, жаноб Миллердан сўрашингиз мумкин, бу битимнинг барча параметрлари келишиб олинган, ҳатто хитойлик дўстларимиз билан нарх параметрлари ҳақида ҳам келишиб олдик, бу эса доим осон бўлмаган нарса. Бизнинг хитойлик дўстларимиз билан музокаралар олиб ориш қийин, улар, албатта, ўз миллий манфаатларидан келиб чиқади. Лекин улар барқарор ва ишончли шериклар», — деди Россия раҳбари.

Июль ўрталарида Мўғулистон ҳукумати «Сибир кучи-2» магистрал газ қувури қурилиши 2024 йилда бошланиши мумкинлигини билдирганди. Financial Times’га берган интервьюсида Оюун-Эрдене Россиянинг Украинадаги махсус операцияси ушбу лойиҳанинг боришини қийинлаштириб қўйганини айтган, аммо ишлар режа бўйича давом эттирилишига умид қилган эди.

Мўғулистон ҳудуди орқали ўтадиган газ қувури Сибирдаги конларни Хитой шимоли-ғарбидаги Шинжон-Уйғур мухтир тумани билан боғлаши керак. Унинг умумий узунлиги тахминан 6,7 минг километрга, лойиҳалаштирилаётган қуввати эса йилига 50 миллиард куб. метрга тенг бўлади.

Шу йилнинг январида South China Morning Post таҳлилчиларга таяниб, Пекин Австралиядан етказмаларга боғлиқликни камайтириш учун «Сибир кучи-2» қурилишини тезлатишга интилаётганини ёзганди. Хитой Бош божхона бошқармаси маълумотларига кўра, 2020 йилда Хитой импорт қилган суюлтирилган табиий газнинг қарийб 43 фоизи Австралия ҳиссасига тўғри келган.