Mo‘g‘uliston bosh vaziri Luvsannamsrayn Oyuun-Erdene Sharqiy iqtisodiy forum sessiyasida nutq so‘zlash chog‘ida mamlakat hududi orqali Rossiyadan Xitoyga gaz quvuri qurilishiga tayyorgarlikning borishi haqida gapirib berdi, deb yozadi “RBK”. Uning so‘zlariga ko‘ra, ushbu loyiha bo‘yicha ishlar 2029-yilgacha yakunlanishi rejalashtirilmoqda.
“Biz allaqachon dastlabki texnik-iqtisodiy asoslarni ishlab chiqdik, ularni ‘Gazprom’ rahbariyati bilan batafsil muhokama qildik. Yaqin kelajakda hujjatlar loyihasini parlamentga kiritamiz”, — dedi Mo‘g‘uliston bosh vaziri.
Vladimir Putin Xitoyga Mo‘g‘uliston orqali gaz yetkazib berish parametrlari va hatto narxlar ham allaqachon kelishib olinganini aytdi. “Mo‘g‘uliston — bizga do‘st bo‘lgan, siyosiy jihatdan barqaror mamlakat va biz bu yerda hech qanday muammolarni ko‘rmayapmiz. Bilishimcha, janob Millerdan so‘rashingiz mumkin, bu bitimning barcha parametrlari kelishib olingan, hatto xitoylik do‘stlarimiz bilan narx parametrlari haqida ham kelishib oldik, bu esa doim oson bo‘lmagan narsa. Bizning xitoylik do‘stlarimiz bilan muzokaralar olib orish qiyin, ular, albatta, o‘z milliy manfaatlaridan kelib chiqadi. Lekin ular barqaror va ishonchli sheriklar”, — dedi Rossiya rahbari.
Iyul o‘rtalarida Mo‘g‘uliston hukumati “Sibir kuchi-2” magistral gaz quvuri qurilishi 2024-yilda boshlanishi mumkinligini bildirgandi. Financial Times’ga bergan intervyusida Oyuun-Erdene Rossiyaning Ukrainadagi maxsus operatsiyasi ushbu loyihaning borishini qiyinlashtirib qo‘yganini aytgan, ammo ishlar reja bo‘yicha davom ettirilishiga umid qilgan edi.
Mo‘g‘uliston hududi orqali o‘tadigan gaz quvuri Sibirdagi konlarni Xitoy shimoli-g‘arbidagi Shinjon-Uyg‘ur muxtir tumani bilan bog‘lashi kerak. Uning umumiy uzunligi taxminan 6,7 ming kilometrga, loyihalashtirilayotgan quvvati esa yiliga 50 milliard kub. metrga teng bo‘ladi.
Shu yilning yanvarida South China Morning Post tahlilchilarga tayanib, Pekin Avstraliyadan yetkazmalarga bog‘liqlikni kamaytirish uchun “Sibir kuchi-2” qurilishini tezlatishga intilayotganini yozgandi. Xitoy Bosh bojxona boshqarmasi ma’lumotlariga ko‘ra, 2020-yilda Xitoy import qilgan suyultirilgan tabiiy gazning qariyb 43 foizi Avstraliya hissasiga to‘g‘ri kelgan.
Izoh (0)