Самарқанд вилоятида шифокорларни ҳақорат қилган аёлга нисбатан терговга қадар текширув ҳаракатлари олиб борилмоқда. Бу ҳақда вилоят ички ишлар бошқармаси матбуот котиби хабар берди.
Маълум бўлишича, 3 сентябрь куни Самарқанд шаҳри Мотрид қўрғонида яшовчи фуқаро К.I. Республика шошилинч тиббий ёрдам илмий маркази Самарқанд филиалида даволаниб чиқиб, «Хужағунжоиш» МФЙда яшовчи танишлариникида қолган.
5 сентябрь куни К.I.нинг турмуш ўртоғи У.Ф. эрининг уйга келмаганидан хавотирланиб, шифохонага борган. Эримни ўлдириб қўйгансанлар деб, тиббиёт ходимларига турли ҳақоратомуз сўзларни айтган.
Ҳодиса жойига ИИБ ходимлари бориб, аёлга эрининг тириклиги, содир этаётган ҳаракатлари ҳуқуқбузарлик экани тушунтирилиб, шифохонадан олиб кетилган. Ҳолат юзасидан Самарқанд шаҳри бўйича ИИО ФМБ томонидан терговга қадар текширув ҳаракатлари олиб борилмоқда.
Изоҳ (0)