Қозоғистон Мажилисининг «Жана Қазақстан» («Янги Қозоғистон») гуруҳи депутатлари мамлакат пойтахти Нур-Султон шаҳрига аввалги Остона номини қайтаришни таклиф қилди. Бу ҳақда депутатлар баёнотига таяниб, Tengrinews ёзмоқда.
«Бирор кишининг ҳали ҳаётлигида шаҳар унинг номи билан аталишини нотўғри деб ҳисоблаймиз, бундан ташқари, халқ ҳам пойтахтнинг янги номини қабул қилмаган. Шундай экан, пойтахтнинг бир пайтлар Қозоғистоннинг биринчи президенти (Нурсултон Назарбоев) томонидан таклиф қилинган номи — Остона номини қайтариш тарихий жиҳатдан адолатли бўлади», — дейилади ҳужжатда.
Депутатларнинг фикрича, ушбу қарор Назарбоевнинг «мамлакатнинг бош шаҳрини шакллантириш ва ривожлантиришга қўшган ҳиссасини» ҳисобга олади ҳамда фуқароларнинг талаб ва умидларини қондиради.
Ҳозир депутатлар гуруҳига 29 киши киради — бу қуйи палатадаги барча 107 ўриннинг 31 фоизини ташкил этади.
Қозоғистон пойтахти номи 2019 йилнинг март ойида мамлакатнинг биринчи президенти Нурсултон Назарбоев шарафига Остонадан Нур-Султонга ўзгартирилган эди. Бу ҳақдаги фармонни Қосим-Жўмарт Тўқаев имзолаган ва таклифни илгари сурган. Шу билан бирга, шаҳар аҳолиси уни Остона деб аташда давом этди.
Ўзгартиришлар кучга киришидан бир неча кун олдин Остона ва Қозоғистоннинг энг йирик шаҳри Олмаотада шаҳар номини ўзгартиришга қарши келишилмаган митинглар ўтказилган. Намойишчилардан баъзилари ҳибсга олинган.
Изоҳ (0)