Финляндиядаги Савония университети профессори Петри Лунаскопри Қашқадарё ҳокими Муроджон Азимовнинг таълим тизимидаги маслаҳатчиси сифатида иш бошлади. Бу ҳақда «Дарё»га вилоят ҳокимлиги ахборот хизмати раҳбари Аҳрор Содиқов хабар берди.
Маълум қилинишича, президент раҳбарлигида 2022 йил 28 январь ва 5 апрель кунлари ўтказилган видеоселектор йиғилишида берилган топшириққа кўра, Муроджон Азимов раҳбарлигидаги жамоа Тошкент шаҳридаги Халқаро Нордик университети билан ҳамкорликни йўлга қўйган. Халқ таълими тизимини такомиллаштириш ва ўқитувчилар малакасини ошириш мақсадида Финляндиядан мутахассис жалб қилган.
«Мазкур мутахассис Финляндиянинг Амалий фанлар бўйича Савония университети профессори Петри Лунаскопри бўлиб, у 20 дан ортиқ давлатларда К12 Олий таълим бўлимининг ўқитиш хизматларида тренер сифатида тажрибага эга. У педагогика фанлари доктори ва педагогика йўналишида халқаро даражадаги мутахассис ҳисобланади. Финляндиядан ташқари Недерландия, Англия, Португалия ва Венгрия давлатларида ишлаган. Финляндия таълими ривожланишига туртки бўлган таълимни ислоҳ қилиш концепцияси муаллифи ҳамдир», — дейди Аҳрор Содиқов.
Айтилишича, янги маслаҳатчи Ўзбекистондаги халқ таълими тизими бўйича ҳам муайян тажриба ва маълумотларга эга. Жумладан, мутахассис жорий йил 15—19 май кунлари «Таълимдаги ўқитиш методикалари бўйича Финляндия тажрибаси» мавзусида республикада тренинглар ўтказган.
«Мутахассисни бир йил муддатга ойлик маош эвазига халқ таълими тизимига жалб қилиш орқали, унинг маҳоратидан вилоят халқ таълимини ривожлантириш бўйича уч йиллик маҳаллий дастурини ишлаб чиқиш, туман (шаҳар) халқ таълими бўлимларидаги икки нафар методистни финляндия таълими тажрибаси бўйича тайёрлаш, вилоят педагогларини янги методикаларга ўргатиш Миллий маркази фаолиятини такомиллаштириш ишларини ривожлантириш мақсад қилинган», — дейди Аҳрор Содиқов.
Қўшимча қилинишича, хорижлик мутахассис вилоятдаги фаолияти давомида рейтингда паст натижа кўрсатган мактабларда тренинглар ўтказади. Ўқитувчиларнинг дарс бериш жараёнини кузатади. Мактабларда ўқитувчиларнинг ўз устида ишлашини рағбатлантирадиган тизим яратади.
«Давлатимиз раҳбари томонидан халқ таълими йўналишида ўтказилган йиғилишларда айнан Финляндия мисол қилиб кўрсатилган. Ушбу мамлакат таълим сифатини баҳолаш бўйича ўтказилган халқаро тадқиқотларда ўз муваффақиятлари билан ажралиб туради. Фин ўқувчилари таълим сифатини баҳолаш бўйича тадқиқотидаги барча йўналишларда саводхонлик кўрсаткичлари бўйича энг яхши натижаларга эришиб келмоқда. Ўз навбатида, финляндиялик мутахассиснинг вилоятимиздаги фаолияти давомида олийгоҳлар талабалари билан ҳам очиқ мулоқотини ташкил қилиш режалаштирилган. Бундан ташқари, тез орада фин мутахассиси салоҳияти билан умумтаълим тизимидаги ўқитувчиларнинг кўпчилик қисмини қамраб олиш ва ўзига хос мулоқот майдонини яратиш мақсадида, телеграм бот ҳам ишга туширилади. Вилоятимиз ўқитувчилари халқ таълимини ривожлантириш бўйича бевосита ғоялар, таклифлар ва мурожаатлар (инглиз тилида) йўллашлари ҳам мумкин», — дейди масъул.
Изоҳ (0)