Навоий вилоятининг Конимех туманида Қозоғистон билан чегарани ноқонуний равишда кесиб ўтмоқчи бўлган бир гуруҳ шахслар қўлга олинди. Бу ҳақда вилоят Ички ишлар бошқармаси хабар қилди.
Қайд этилишича, бир гуруҳ йигитлар Қозоғистонга ноқонуний равишда ўтиб, у ерда ишлашни режалаштирган. Шу режа асосида улар Конимех тумани «Боймурод» ОФЙга қарашли «Янги турмуш» маҳалласидаги дашт ҳудудидан ўтувчи айланма йўллар орқали ўртадаги масофани босиб ўтиш учун пиёда йўлга чиққан.
Йигитларга бош бўлган бухоролик фуқаро (22 ёшли) жиноят ишлари бўйича Қоракўл туман суди томонидан 2020 йилда Жиноят кодексининг 104-моддаси (қасддан баданга оғир шикаст етказиш) бўйича судланиб, 2 йил муддатга озодликдан маҳрум этилган.
Ҳозирда қонунга хилоф равишда чет элга чиқиш ҳамда Ўзбекистонга кириш жиноятини содир этган ва бу жиноятни содир этишда кўмаклашган шахсларга нисбатан Жиноят кодексининг тегишли моддаси билан жиноят иши қўзғатилган. Тергов ҳаракатлари олиб борилмоқда.
Изоҳ (0)