Европада газ нархи омборларни тез тўлдириш туфайли арзонлашмоқда

Европада газ нархи минг куб метр учун тахминан 3 050 долларни ташкил қилди. Bloomberg таҳлилчилари ресурс нархининг пасайишини Европадаги газ омборларини тез тўлдириш ҳақидаги хабарлар билан изоҳламоқда.

Агентлик материалида Германия Иқтисодиёт вазири Роберт Хабекнинг баёноти келтирилади, у федерал ҳукуматнинг келгуси ойнинг бошида газ омборларини 85 фоизга тўлдириш режаларини эълон қилди. 

Октябр ойидаги 85 фоизлик кўрсаткичга сентябр ойининг бошига қадар эришиш керак, — дейилади меморандумда.

2022 йилда «Газпром»нинг МДҲдан ташқари давлатларга экспорти 36,2 фоизга камайди. Бунинг оқибатида газ нархи кескин ошган эди. 

Ўтган ҳафтада спот газ нархи минг куб метр учун 3 500 долларгача кўтарилган эди. Рекорд нарх март ойида қайд этилган — 3 892 доллар.

Аввалроқ «Газпром» бу қишда Европада газ нархи минг куб метр учун рекорд даражадаги 4 минг доллардан ошишини прогноз қилган эди.