Шавкат Мирзиёев 29 август куни Германия президенти Франк-Валтер Штайнмаер билан телефон орқали мулоқот қилди. Бу ҳақда президент матбуот хизмати хабар берди.
Қайд этилилшича, суҳбатда кўп қиррали Ўзбекистон–Германия ҳамкорлигини янада ривожлантириш ҳамда минтақавий шерикликнинг долзарб масалалари кўриб чиқилди. Суҳбат аввалида Германия президенти Шавкат Мирзиёев ва Ўзбекистон халқини мустақилликнинг 31 йиллиги билан қутлади. Кейинги йилларда амалга оширилаётган ислоҳотлар дастурининг натижалари алоҳида қайд этилди, Ўзбекистонда амалга оширилаётган демократик ва иқтисодий янгиланишлар қўллаб-қувватланди.
Етакчилар олий даражадаги келишувларни амалга ошириш натижасида икки томонлама муносабатларда юксак даражага эришилганини қайд этди. 2022 йил бошида ўзаро товар айирбошлаш 60 фоизга ўсди. Мамлакатдан Германиянинг 200 дан зиёд етакчи компаниялари муваффақиятли фаолият юритмоқда. Ўтган ойда «Knauf», «Папенбург» ва «Фалк Porsche» каби таниқли корхоналарда Ўзбекистонда ўзларининг янги заводларини ишга туширди.
Шу йилнинг июль ойида Германия бизнесининг 100 дан ортиқ вакиллари иштирокида ўтган Ўзбекистон–Германия ишбилармонлар кенгашининг навбатдаги йиғилишидан сўнг иқтисодиётнинг юқори технологик тармоқларида 24 та янги инвестиция лойиҳасини тайёрлаш ва амалга ошириш бошланди. Ўзаро манфаатли молиявий-техник ва маданий гуманитар ҳамкорлик кенгайиб бормоқда. Гёте институти, Конрад Аденауэр ва Фридрих Эберт фондлари, Германиянинг бошқа ташкилотлари фаол иш олиб бормоқда.
Ўзбекистон ва Германия президентлари амалий ҳамкорликнинг кенгайиши, шунингдек, узоқ муддатли шерикликни ривожлантиришга қаратилган қўшма дастур ва лойиҳаларнинг илгари сурилишини қўллаб-қувватлади. Минтақавий ҳамкорлик, шу жумладан, Европа Иттифоқи доирасидаги конструктив мулоқотни ривожлантириш масалаларига алоҳида эътибор қаратилди. Афғонистонда узоқ муддатли тинчликни таъминлаш ва унинг ижтимоий-иқтисодий тикланишига кўмаклашиш мақсадида фаол ҳамкорликни давом эттириш муҳим экани таъкидланди.
Изоҳ (0)