Сув хўжалиги вазирлиги Айдар—Арнасой кўл тизимини ишончли бошқарувга ўтказиш бўйича танлов эълон қилди. Бу ҳақда Давлат активларини бошқариш агентлиги хабар берди.
Танловда устав капиталида давлат улуши бўлмаган маҳаллий корхоналар иштирок этиши мумкин.
Ариза берувчи ноёб балиқ турларини кўпайтириш ва балиқни қайта ишлаш технологияси бўйича тажрибага эга бўлиши керак.
Бундан ташқари, 2022—2026 йиллар давомида қуйидагиларни амалга ошириш талаби юклатилади:
- камида 30 млн АҚШ доллари миқдорида инвестиция киритиш;
- кўллар тизимидан йиллик балиқ овлаш ҳажмларини 15 минг тоннагача етказиш ҳамда океаник қафас (садок) мосламаларини ўрнатиш орқали қўшимча 5 минг тонна балиқ етиштириш;
- кўллар тизимининг «Тузкон» кўли ҳудудида «Балиқ ишлаб чиқариш» комплекси ташкил этиш ва ушбу комплексда йилига 3 минг тонна балиқни қайта ишлаш корхонасини ишга тушириш;
- ҳудуддаги туризм салоҳиятини ошириб, унинг имкониятларидан самарали фойдаланган ҳолда ҳаваскор ва спорт балиқ ови туризмини кенгайтириш, сайёҳларга хизмат кўрсатиш ҳажмини ошириш;
- кўллар тизимининг биологик хилма-хиллигини сақлаш, балиқ захираларини илмий ёндашган ҳолда кўпайтириш;
- хорижий мутахассисларни жалб қилган ҳолда, кўллар тизимида шўр сувда балиқ захираларини кўпайтириш бўйича лаборатория марказини ташкил этиш;
- кўллар тизими ҳудудидаги коллектор-дренаж тармоқларини тўлиқ тозалаш.
Агар шартномадаги барча талаблар бажарилса, ишончли бошқарув 49 йилга (2071 йилгача) узайтирилади.
Танловда иштирок этиш учун талабгор 7 сентябрь соат 16:00 гача ариза юбориши керак.