Покистонда сув тошқини билан боғлиқ ҳодисаларда 48 соат ичида 126 киши ҳалок бўлди, қурбонларнинг аксарияти аёллар ва болалар. Бу ҳақда мамлакат Табиий офатларни бошқариш миллий бошқармасига таяниб, Associated Press хабар берди.
Мамлакатда июнь ойи ўрталаридан бери давом этаётган кучли ёмғирлар сув тошқинларига сабаб бўлмоқда. Оқибатда жами 903 киши ҳалок бўлган, 50 мингга яқин одам бошпанасиз қолган.
Қайд этилишича, уйлари вайрон бўлган минглаб одамлар ҳозирда сув остида қолган қишлоқ ва шаҳарларидан бир неча чақирим узоқликдаги чодирларда яшамоқда. Одамларни қутқаришда ҳарбийлар, маҳаллий қутқарувчилар ва кўнгиллилар иштирок этмоқда.
Тошқин Покистондаги иқтисодий инқирозни янада кучайтирди. Бош вазир Шаҳбоз Шариф хориж давлатларига мурожаат қилиб, хайриячиларни Покистондаги тошқиндан жабр кўрган ҳудудларга ёрдам беришга чақирди.
Шариф айни дамда Қатарда ҳам бўлган ҳамда ўз мамлакати учун молиявий ёрдам, кредит ва хорижий сармоя излаган. Унинг ҳукумати сув тошқинларида уйларидан айрилганларга товон пули тўлашга ваъда берган.
Шариф Қатар амири Шайх Тамим бин Ҳамад Ал Тани билан музокараларни якунлагач, Қатар сармоя бошқармаси Покистонга 3 миллиард доллар сармоя киритишга тайёрлигини маълум қилди. Ушбу сафар Шарифнинг бош вазир сифатида Қатарга қилган илк расмий ташрифидир. Эслатиб ўтамиз, у апрель ойида парламентнинг ишончсизлик вотуми ортидан лавозимидан кетган Имрон Хоннинг ўрнини эгаллаганди.
Изоҳ (0)