Ўзбекистон ва Беларусь тоғ-кон саноати ҳамда қатор ишлаб чиқариш соҳаларида ҳамкорлик қилмоқчи

Ўзбекистон ва Беларусь бош вазирлари ўринбосарлари Ўзбекистонда тоғ-кон саноати ва қишлоқ хўжалиги техникаси, шунингдек, диодлар, микроэлектроника, микрочиплар ишлаб чиқаришни ташкил этиш масалаларини кўриб чиқди, деб хабар бермоқда Инвестициялар ва ташқи савдо вазирлиги.

Маълум қилинишича, 25 август куни Минск шаҳрида Ўзбекистон бош вазири ўринбосари — инвестициялар ва ташқи савдо вазири Жамшид Хўжаев Беларусь бош вазири ўринбосари Пётр Пархомчик билан музокаралар ўтказган. Учрашув давомида томонлар Ўзбекистон–Беларусь ҳамкорлигининг ҳозирги ҳолати юзасидан ўзаро фикр алмашган.

Хусусан, Ўзбекистонда махсус тоғ-кон ва қишлоқ хўжалиги техникаларини биргаликда ишлаб чиқаришни ташкил қилиш имкониятлари кўриб чиқилган. Музокаралар жараёнини тезлаштириш ва лойиҳани амалга ошириш бўйича ишлаб чиқилган «йўл харитаси»ни тасдиқлаш тўғрисида келишувга эришилган.

Саноат кооперацияси ва инвестиция ҳамкорлиги масаласига истиқболли йўналишлар сифатида урғу берилган. Шу нуқтаи назардан янги лойиҳаларни амалга ошириш имконияти муҳокама қилинган. Жумладан, «Энергокомплект» компанияси билан Тошкент вилоятида ўтказгичли кабел маҳсулотлар ишлаб чиқариш, «Плонар» компанияси билан диодлар ишлаб чиқариш ва ушбу соҳада тажриба алмашиш, шунингдек, «Интеграл» компанияси билан микроэлектроника ва микрочиплар ишлаб чиқаришни ташкил этиш масалалари муҳокама қилинган.

Музокаралар жараёнида мебель саноати соҳасидаги ҳамкорликнинг истиқболларига алоҳида тўхталиб ўтилган. Томонлар кооперация имкониятларини ўрганишга ҳамда чуқур таҳлил асосида қўшма инвестиция лойиҳаларини ишлаб чиқишга келишиб олдган. Музокаралар якунида йиғилишда эришилган келишувлар ва ташаббусларни амалга ошириш бўйича қўшма ҳаракатлар режасини ишлаб чиқишга қарор қилинган.