АҚШ нодавлат ташкилоти Қорақалпоғистонга тиббий буюмлар ва жиҳозларнинг навбатдаги туркумини етказиб беришни режалаштирмоқда. Бу ҳақда «Дунё» ахборот агентлиги хабар берди.
Қайд этилишича, инсонпарварлик ёрдамининг навбатдаги туркумини Қорақалпоғистонга етказишнинг амалий жиҳатларини муҳокама қилиш мақсадида Ўзбекистон элчиси Жавлон Ваҳобов Американинг «Project C.U.R.E.» хайрия ташкилоти директори Мелисса Эспости билан учрашган. Гуманитар ёрдам таркиби Қорақалпоғистон соғлиқни сақлаш органларига топшириш учун тиббий буюмлар ва жиҳозлардан иборат бўлади.
Учрашувда Америка томони «Project C.U.R.E.» Орол денгизининг қуриши оқибатларидан жабр кўрган Қорақалпоғистон аҳолисига инсонпарварлик ёрдамини кўрсатишни давом эттириш ниятини маълум қилди. Мелисса Эспостининг айтишича, бугунги кунга қадар умумий қиймати 1,5 миллион долларлик тиббий асбоб-ускуналардан иборат бешта контейнер етказиб берилган бўлиб, улардан Қорақалпоғистондаги техник жиҳозларга жуда муҳтож бўлган тиббиёт муассасалари фойдаланмоқда. Ташкилот вакилининг маълумотларига кўра, 2022 йил охирига қадар ташкилот инсонпарварлик ёрдамининг навбатдаги туркумини Қорақалпоғистонга етказиш режалаштирилмоқда.
Мелисса Эспости Орол денгизи минтақасидаги вазиятни яхшилаш учун ташкилот лойиҳаси билан бир қаторда АҚШдан донорларни жалб қилишга ёрдам беришга тайёр эканини ҳам маълум қилди. Унинг айтишича, Орол денгизи экотизимини тиклаш ва тўғри бошқариш минтақа атроф-муҳитини барқарор ривожлантиришнинг гаровидир. Шу муносабат билан Марказий Осиё давлатлари саъй-ҳаракатларини бирлаштириш, шунингдек, маҳаллий ва хорижий ҳамжамият, ҳамкорлар ва донорларнинг фаол иштирокини таъминлаш орқали Орол денгизини тиклаш бўйича қатъий қадамлар қўйилиши зарур.
Ўзбекистон элчихонаси маълумотларига кўра, аввал Ўзбекистоннинг АҚШдаги элчиси Жавлон Ваҳобов ва ташкилот президенти Дуглас Жексон ўртасида Қорақалпоғистонга 3 миллион долларлик тиббий асбоб-ускуналар ва соғлиқни сақлаш буюмларини етказиб бериш бўйича эришилган келишув доирасида 2021 йил май ойида тиббий буюмлар ва жиҳозлардан иборат биринчи контейнер минтақа соғлиқни сақлаш идораларига юборилган. 2022 йилнинг июль ойида эса умумий ҳажми 16,8 тонна бўлган, 2,9 минг дона тиббиёт буюмлари жамланган тўртта контейнер етказиб берилган.
Изоҳ (0)