Андижон, Наманган вилояти тарихи ва маданияти давлат музейларида жами 54 миллион 700 минг сўм, Термиз давлат музей-қўриқхонасида 3 миллиард 467 миллион сўмга яқин зарар қиймати аниқланди. Бу ҳақда Маданий мерос агентлиги хабар қилди.
Қайд этилишича, Маданий меросни ҳимоя қилиш инспекцияси бошчилигида ишчи гуруҳ жорий йилнинг июнь—июль ойлари Андижон, Наманган вилояти тарихи ва маданияти давлат музейларида ҳамда Термиз давлат музей қўриқхонасида сақланаётган ноёб ашёлари хатловдан ўтказилган ҳамда уларнинг сақланиши ва хавфсизлик ҳолати ўрганилган.
Ўрганишда Андижон вилояти тарихи ва маданияти давлат музейида жами 4 дона, Наманган вилояти тарихи ва маданияти давлат музейида жами 9 дона ашёлар музейнинг Кирим ва Инвентар китоблари ҳамда илмий паспортларининг тавсифномаларига, ўлчами, ишланиш услубива яратилган даври бўйича мос келмаслиги аниқланган.
Шунингдек, Термиз давлат музей қўриқхонасида ҳам ўрганишлар олиб борилган ва жами 24 дона ашёлар музейнинг Кирим ва Инвентар китоблари ҳамда илмий паспортларининг тавсифномаларига, ўлчами, ишланиш услуби ва яратилган даври бўйича мос келмаслиги, 58 номдаги ашёлар музей фондида йўқлиги маълум бўлган.
Маданий мерос агентлигининг 2022 йил 19 августдаги санъатшунослик эксперти хулосаларига кўра, Андижон вилояти тарихи ва маданияти давлат музейида аниқланган зарар қиймати 31 миллион сўмни, Наманган вилояти тарихи ва маданияти давлат музейида 23 миллион 700 минг сўмни, Термиз давлат музей қўриқхонасида 3 миллиард 466 миллион 800 минг сўмни ташкил қилади.
Изоҳ (0)