Ижтимоий тармоқларда Сурхондарё вилояти ҳокими Тўра Боболовнинг обуна бўйича аудиоси тарқалди. Вилоят ҳокимлиги бунга муносабат билдирди.
Унда айтилишича, 2022 йилда вилоят ҳокими раҳбарлигида обуна масаласида йиғилиш, учрашув ўтказилмаган. Мазкур аудиоёзув 2021 йилдаги йиғилишлардан монтаж қилинган.
«Сурхондарё вилояти ҳокимлиги ‘Сурхон тонги’ ва ‘Заря Сурхана’ газеталарига муассис ҳисобланади. ‘Оммавий ахборот воситалари тўғрисида’ги қонуннинг 14-моддасида муассис зиммасига юклатилган вазифалар қаторида ўз муассислигидаги оммавий ахборот воситасининг чиқарилишини таъминлаш ҳам бор.
Шунингдек, ҳудудлардаги давлат муассасаларига ўз соҳасига алоқадор босма нашрларга йиллик обуна учун маблағ ҳам ажратилади. Вилоят раҳбари ‘мажбурий’ сўзини ишлатганида ана шу маблағ асосида обуна бўлишга эътибор қаратган.
‘Ихтиёрий’ сўзини эса ўз маблағлари ҳисобидан ўзлари истаган ёки қизиқиб мутолаа қиладиган нашрга мустақил обуна бўлишини назарда тутган», — дейилади ҳокимлик изоҳида.
Қайд этилишича, айни пайтда вилоят ҳокимлиги муассислигидаги «Сурхон тонги» газетаси 9430, «Заря Сурхана» газетаси 1300 нусхада чоп этилмоқда. Таҳририят ижодкорлари бошқа соҳалар қатори таълим тизими ходимлари, ҳурматли устоз ва мураббийлар билан яқин ҳамкорлик асосида фаолият юритиб, газеталарнинг деярли ҳар бир сонида таълимга оид ҳамда ўқитувчи ва мураббийлар қаламига мансуб мақолаларни ҳам чоп этиб келмоқда.
«Шу ўринда, ижтимоий тармоқ фаолларидан пашшадан фил ясаб, вилоят ҳокимининг фикрларини нотўғри талқин қилмасликни, даврий босма нашрлар обунаси ҳақида ноўрин тушунчага бормасликни сўраган ҳолда вилоят ҳокимлиги бундан кейин ҳам барча соҳалар сингари воҳадаги матбуот ва босма даврий нашрлар фаолиятини қўллаб-қувватлашга тайёр эканини маълум қиламиз», — дейилади хабарда.
Эслатиб ўтамиз, 18 август куни ижтимоий тармоқларда Тўра Боболовнинг Ангор тумани прокурорини ҳақорат қилгани айтилган аудиоёзув ҳам тарқалганди. Ҳокимлик аудиоматериал 2022 йилнинг февраль ойида ҳокимлик соатидаги муҳокамадан кесиб олинганини билдирди. Бош прокуратура тарқатилган аудиоёзувларнинг ҳаққонийлиги, қачон, қаерда ва қандай ҳолатларда юз берганлиги ҳамда бошқа ҳолатлар ўрганилаётганини маълум қилди.
Изоҳ (0)