«АрМИ—2022» халқаро армия ўйинлари доирасида Россия ҳамда Мўғулистонда ўтказилган «Ҳарбий ралли» мусобақаси якунига етди. Бу ҳақда Мудофаа вазирлиги хабар қилди.
Қайд этилишича, жанговар вазиятларда тўғри ва аниқ ҳаракатланиш кўникмасини оширадиган, ҳарбий хизматчиларнинг ҳайдовчилик маҳоратини синовдан ўтказадиган «Ҳарбий ралли» мусобақасида Ўзбекистон жамоаси бу йил бешинчи бор қатнашган.
Жамоа 12 август куни Муғулистоннинг Улаангом вилоятида мусобақада қатнашадиган ҳарбий техникаларда етиб борган ва машғулот жараёнларида тайёргарлик кўрган. Бугунги кунгача жами тўртта — «Якка тартибдаги пойга», «Таъқиб қилиш билан пойга», «Отиш» ҳамда «Жамоавий пойга» шартларини ўз ичига олган мусобақада ўзбекистонлик ҳарбийлар иштирок этиб, иккинчи ўринни қўлга киритган.
Мусобақа биринчилигини мезбон давлат Россия қўлга киритган. Беларусь ва Мўғулистон шоҳсупанинг учинчи поғонасини банд этган.
Изоҳ (0)