Швейцария соатлари экспорти кескин ошиб, рекордга яқинлашди

Июль ойида Швейцария соатларининг экспорти тарихий максимал даражага яқинлашди. Мутахассисларнинг таъкидлашича, пандемия даврида бошланган ҳашаматли товарларга талабнинг ўсиши давом этмоқда. Бу ҳақда Forbes хабар бермоқда.

Швейцария соатларининг экспорти уларга бўлган талабнинг ўсиши туфайли жадал ривожланмоқда ва июль ойида энг юқори даражага яқинлашди. 

Экспорт 2021 йил июлидан 8,3 фоизга ўсиб, 2,2 миллиард франкни (2,3 миллиард доллар) ташкил этди. Бу 2014 йил октябрь ойидан бери энг юқори кўрсаткичдир, — дейди Швейцария соатлар саноати федерацияси.

Июль ойида пўлатдан ясалган соатлар экспорти 9,5 фоизга, қимматбаҳо металлар — 4,8 фоизга, бошқа металлар — 34 фоизга ва бошқа материаллар экспорти 54,1 фоизга ўсди.

Экспорт нархи 500 франкдан (523 доллар) ортиқ бўлган соатлар маҳсулот ҳажмининг учдан биридан кўпроғини ва экспорт айланмасининг деярли 95 фоизини ташкил этди. 

Июль ойида уларнинг экспорти 10,8 фоизга, қиймати 200 франкдан (209 доллар) кам бўлган соатлар экспорти эса 5,3 фоизга ошди. 

Шу билан бирга, 200 франк ва 500 франк нарх оралиғидаги соатлар экспорти 2000 йил бошидан буён доимий равишда пасайиб бормоқда ва июль ойида унинг қиймати 29,2 фоизга пасайган.

Bloomberg таъкидлашича, пандемия пайтида кўплаб истеъмолчилар уйда қолиб кетган Швейцария брендларини қайта кашф этганидан сўнг ҳашаматли соатларга талаб кескин ошди. Юқори сифатли маҳсулотларга талаб ошишда давом этмоқда.

Июль ойида АҚШга Швейцария соатлари экспорти ўтган йилга нисбатан 13,5 фоизга ошди. АҚШ 14,6 фоиз улуш билан ушбу бозордаги энг йирик харидор бўлиб қолмоқда. 

Швейцария соатларининг энг йирик 5 та импортчилари қаторига Хитой (14,2 фоиз), Гонконг (7,7 фоиз), Сингапур ва Япония (ҳар бири 6,3 фоиздан) киради.