Шавкат Мирзиёев 18 август, Саудия Арабистонига давлат ташрифининг иккинчи кунида Жидда шаҳрида Ислом ҳамкорлик ташкилоти бош котиби Ҳусайн Иброҳим Тоҳа билан учрашди. Бу ҳақда Президент матбуот хизмати хабар қилди.
Қайд этилишича, бугунги кунда Ислом ҳамкорлик ташкилоти 1 миллиард 700 миллион аҳоли яшайдиган 57 та давлатни бирлаштирган дунёдаги энг йирик халқаро тузилмалардан бири ҳисобланади. Ўзбекистон ИҲТга 1996 йилда аъзо бўлганидан буён ташкилот билан савдо-иқтисодий, илмий, маданий ҳамкорлик изчил ривожланиб бормоқда.
Учрашувда Ўзбекистон билан OIS ўртасидаги ҳамкорликнинг бугунги даражаси, уларни барча долзарб йўналишларда кенгайтириш истиқболлари юқори баҳоланган.
Ҳусайн Иброҳим Тоҳа Ўзбекистон Ислом ҳамкорлик ташкилотида алоҳида ўрин тутиши, мамлакат илгари сураётган лойиҳа ва дастурларни ҳар томонлама қўллаб-қувватлашини қайд этган. ИҲТ мамлакатлари туризм вазирлари томонидан Хива шаҳри 2024 йилда «Ислом дунёсининг туризм пойтахти» деб эълон қилингани билан табриклаган.
Ўзбекистон бундан буён ҳам таълим, фан, инновациялар соҳаларида, иқлим ўзгариши масалаларида ИҲТ билан ҳамкорлик қилишга алоҳида эътибор қаратиши таъкидланган.
Оила институтини мустаҳкамлаш, хотин-қизларнинг жамият ҳаёти ва давлат бошқарувидаги иштирокини кучайтириш каби муҳим ижтимоий йўналишларда, шу жумладан, ИҲТга аъзо мамлакатлар ўртасида тажриба алмашишга келишиб олинган.
Ўзбекистоннинг фан ва таълим соҳаларидаги салоҳияти қайд этилган. ИҲТ мамлакат билан ташкилотга аъзо ривожланаётган давлатларда ёшларни ўқитиш ва малакасини ошириш борасида ҳамкорликни ривожлантиришдан манфаатдор экани таъкидланган.
«Ўзбекистон – буюк мутафаккирлар ва олимлар юрти, ташкилотимиз бу соҳаларда республикангиз билан ҳамкорлик қилишдан манфаатдор», деди бош котиб.Афғонистон халқига гуманитар кўмак кўрсатиш масалаларига алоҳида эътибор қаратилган. Термиздаги логистика марказини ривожлантириш орқали ушбу мамлакатга инсонпарварлик ёрдамини етказиш мумкинлиги қайд этилган. Термиздаги Афғон ёшлари учун таълим маркази фаолиятига юқори баҳо берилган.
Глобал, энг аввало, Орол минтақасидаги экологик муаммоларни ҳал қилиш масалалари муҳокама қилинган. ИҲТ бош котиби жорий йил мартда Исломободда ИҲТга аъзо давлатлар ташқи ишлар вазирлари Ўзбекистон томонидан ишлаб чиқилган Оролбўйи ҳамда Марказий ва Жанубий Осиё минтақавий боғлиқлиги тўғрисидаги резолюцияларни қўллаб-қувватлаганини қайд этган.
«Орол денгизи ва Чад кўлининг қуриши бир-бирига ўхшаш муаммолардир, ушбу глобал экологик хатарларни бартараф этиш халқаро ҳамжамият ва молиявий институтларни жалб қилишга қаратилган умумий ҳамкорликни тақозо этади», — деган Ҳусайн Иброҳим Тоҳа.
Уларга ечим излаш мақсадида илмий ва амалий тажриба алмашиш, халқаро мутахассисларни жалб қилган ҳолда саъй-ҳаракатларни мувофиқлаштиришга келишиб олинган.
Учрашув якунида Ўзбекистон президенти бош котибни мамлакатга ташриф билан боришга таклиф этган. Ҳусайн Иброҳим Тоҳа бу таклифни қабул қилган.
Изоҳ (0)