Шавкат Мирзиёевнинг Саудия Арабистонига давлат ташрифига тайёргарлик кўриш жараёнида инвестициялар ва ташқи савдо вазири Жамшид Хўжаев мамлакатнинг атроф-муҳит, сув ва қишлоқ хўжалиги вазири Абдулраҳмон ал-Фадли билан музокаралар ўтказди. Бу ҳақда вазирлик ахборот хизмати хабар қилди.
Қайд этилишича, томонларнинг диққат марказида қишлоқ хўжалиги соҳасидаги ҳамкорликни кенгайтиришнинг жорий масалалари ва истиқболлари бўлган.
Ўзбекистон томони Саудия Арабистонилик ҳамкорларининг тажрибаси жалб қилиниши режалаштирилган аниқ йўналишларни таклиф қилган. Хусусан, сўз аграр соҳада инновацияларни жорий этиш ва таълим тизимини такомиллаштириш лойиҳалари ҳақида борган.
Соҳа доирасидаги барча илмий-тадқиқот институтларининг ўзаро ҳамкорлигини фаоллаштириш мақсадида Ўзбекистон Қишлоқ хўжалигида билим ва инновациялар миллий маркази (АКИС) ва Саудия Арабистонининг Барқарор қишлоқ хўжалиги миллий илмий-тадқиқот маркази ўртасида ҳамкорлик ўрнатиш тўғрисида келишувга эришилган.
«Музокаралар якунида томонлар Саудия Арабистони компанияларини Ўзбекистон билан қўшма лойиҳаларни ишлаб чиқишга жалб қилиш бўйича саъй-ҳаракатларни бирлаштиришга келишиб олган. Бу Ўзбекистонда юқори сифатли қишлоқ хўжалиги маҳсулотларини ишлаб чиқариш ва кейинчалик Саудия Арабистонига экспорт қилиш учун имконият яратади», — дейилади хабарда.
Мавзуга доир:
Изоҳ (0)