Shavkat Mirziyoyevning Saudiya Arabistoniga davlat tashrifiga tayyorgarlik ko‘rish jarayonida investitsiyalar va tashqi savdo vaziri Jamshid Xo‘jayev mamlakatning atrof-muhit, suv va qishloq xo‘jaligi vaziri Abdulrahmon al-Fadli bilan muzokaralar o‘tkazdi. Bu haqda vazirlik axborot xizmati xabar qildi.
Qayd etilishicha, tomonlarning diqqat markazida qishloq xo‘jaligi sohasidagi hamkorlikni kengaytirishning joriy masalalari va istiqbollari bo‘lgan.
O‘zbekiston tomoni Saudiya Arabistonilik hamkorlarining tajribasi jalb qilinishi rejalashtirilgan aniq yo‘nalishlarni taklif qilgan. Xususan, so‘z agrar sohada innovatsiyalarni joriy etish va ta’lim tizimini takomillashtirish loyihalari haqida borgan.
Soha doirasidagi barcha ilmiy-tadqiqot institutlarining o‘zaro hamkorligini faollashtirish maqsadida O‘zbekiston Qishloq xo‘jaligida bilim va innovatsiyalar milliy markazi (AKIS) va Saudiya Arabistonining Barqaror qishloq xo‘jaligi milliy ilmiy-tadqiqot markazi o‘rtasida hamkorlik o‘rnatish to‘g‘risida kelishuvga erishilgan.
“Muzokaralar yakunida tomonlar Saudiya Arabistoni kompaniyalarini O‘zbekiston bilan qo‘shma loyihalarni ishlab chiqishga jalb qilish bo‘yicha sa’y-harakatlarni birlashtirishga kelishib olgan. Bu O‘zbekistonda yuqori sifatli qishloq xo‘jaligi mahsulotlarini ishlab chiqarish va keyinchalik Saudiya Arabistoniga eksport qilish uchun imkoniyat yaratadi”, — deyiladi xabarda.
Mavzuga doir:
- Saudiya Arabistoni O‘zbekiston bilan 11,99 mlrd dollarlik investitsiya shartnomalarini imzoladi
- O‘zbekiston va Islom hamkorlik tashkiloti o‘rtasidagi hamkorlikni kengaytirishga doir kelishuvga erishildi
- Jiddada Shavkat Mirziyoyevning Saudiya Arabistoniga tashrifiga tayyorgarlik masalalari muhokama qilindi
Izoh (0)